Toyota Motor kompaniyasi Buyuk Britaniyadagi ikkita hamda Fransiyadagi bitta zavodini vaqtincha yopdi. Bunga o‘tgan hafta Britaniyada koronavirus infeksiyasining yangi shtammi aniqlangani sabab qilib ko‘rsatilgan, deb xabar beradi Motor.
Koronavirusning yangi turi logistika borasida muammolarni yuzaga keltirgan. Gap, xususan, La-Mansh tunneli orqali poyezd va mashinalar harakatining to‘xtatilishi haqida ketmoqda — u orqali zavodlarga ehtiyot qismlar yetkaziladi.
Toyota’ning Buyuk Britaniyadagi korxonalarida 2019-yildan boshlab Corolla, 2020-yildan esa Suzuki Swace, shuningdek, dvigatellar yig‘ilmoqda. Zavodning Fransiyadagi konveyridan esa Yaris xetchbeki va uning Cross versiyasi ishlab chiqariladi.
Mamlakatda koronavirusning yangi shtammi aniqlangani to‘g‘risida 14-sentabr kuni Buyuk Britaniya sog‘liqni saqlash vaziri Mett Xenkok ma’lum qilgan. Britaniyalik shifokorlarning so‘zlariga ko‘ra, COVID-19’ning yangi turi 70 foizdan ortiqroq yuqumli hisoblanadi.
Eslatib o‘tamiz, mart oyida ham Yaponiya avtomobilsozlik kompaniyasi Yevropa, Buyuk Britaniya va Turkiyadagi zavodlari faoliyatini vaqtincha to‘xtatgan edi.
Jahon sog‘liqni saqlash tashkiloti 20-dekabr kuni Britaniyanikiga o‘xshash koronavirus Niderlandiya, Daniya va Avstraliyada ham aniqlanganini e’lon qildi. Hozirda tashkilot bu shtammni o‘rganmoqda.
Izoh (0)