O‘zbekistonda 2019-yilda “103” tez tibbiy yordam xizmatiga dori-darmon uchun 26,5 milliard so‘mdan ortiq mablag‘ ajratilgan, 2020-yilda bu ko‘rsatkich 75,3 milliard so‘mdan ziyodni tashkil etdi. Bu haqda Sog‘liqni saqlash vazirligi xabar berdi.
Vazirlik xabariga ko‘ra, hozirda har bir chaqiriq vaqtida dori-darmon uchun minimal xarajatlar 5000 so‘m miqdorida belgilandi. Bu ko‘rsatkich 2016-yilda 748 so‘mni, 2017-yilda 1627 so‘mni tashkil etgan.
Qayd etilishicha, so‘nggi yillarda davlat budjetidan soha uchun ixtisoslashtirilgan avtotransport xarid qilish va hududlarning ushbu texnikaga bo‘lgan ehtiyojini qoplashga katta e’tibor qaratilmoqda. Jumladan, 2019-yilda tez tibbiy xizmatda ixtisoslashgan zamonaviy avtotransportlar soni 2403 tani tashkil qilgan bo‘lsa, 2020-yilda ularning soni 2746 taga yetdi.
Bu avtotransport vositalarining aksariyati sun’iy nafas berish, EKG apparatlari, mexanik so‘rg‘ich, defibrillyator, immobilizatsiya shinalari bilan ta’minlangan.
Vazirlikning ta’kidlashicha, mamlakat bo‘ylab tez yordam xizmatining ratsiya aloqasi, telefon va planshet bilan ta’minlanish darajasi ham oshib bormoqda. Barcha tez yordam mashinalarida qulay aloqani, chaqiriqlar uchun mashinani tezkor yo‘naltirishni ta’minlovchi GPS tizimini yo‘lga qo‘yishga ham alohida e’tibor berilmoqda.
“Endilikda yurtimizda har 13 ming aholiga bitta maxsus tez yordam mashinasi xizmat ko‘rsatadi. Bu borada rivojlangan davlatlar tajribasini kuzatsak, ularda 20-25 ming kishiga bitta maxsus avtotransport vositasi to‘g‘ri keladi”, — deyiladi SSV xabarida.
Avvalroq O‘zbekistonda 2019-yilda yil davomida “103” tez tibbiy yordam xizmati 10 millionga yaqin chaqiriqni qabul qilgani, 2020-yilning 11 oyi davomida bu ko‘rsatkich 10 milliondan oshgani haqida xabar berilgandi.
Ma’lumot uchun, 2017—2018-yillar mobaynida O‘zbekiston tarixida birinchi marta tez tibbiy yordam xizmati uchun 1500 ta yangi ixtisoslashgan avtomashina xarid qilingan. 2020-yil yanvar oyida Toshkentdagi tez tibbiy yordam xizmati uchun xorijdan keltirilgan 150 ta Ford zamonaviy reanimobili foydalanishga topshirilgan. Viloyatlarda ham shunday tizimni joriy qilish rejalashtirilgan.
Bundan tashqari, SamAvto zavodida Isuzu D-Max pikaplari negizida tez tibbiy yordam mashinalarini ishlab chiqarilmoqda. Jizzax avtomobil zavodi esa Volkswagen Caddy bazasida maxsus jihozlangan tez yordam avtomobillarini ishlab chiqarmoqda.
Izoh (0)