O‘zbekistonda 2019-yilda yil davomida “103” tez tibbiy yordam xizmati 10 millionga yaqin chaqiriqni qabul qilgan, 2020-yilning 11 oyi davomida bu ko‘rsatkich 10 milliondan oshgan. Bu haqda Sog‘liqni saqlash vazirligi xabar berdi.
Vazirlik ma’lumotiga ko‘ra, 2020-yilda eng ko‘p chaqiriq Farg‘ona, Andijon, Toshkent viloyatlari va Toshkent shahrida kelib tushgan bo‘lib, ularning soni bir milliondan oshgan. Eng kam murojaat esa Navoiy viloyatida qayd etilgan bo‘lib, ularning soni 297 mingdan ortgan.
Vazirlik 2020-yilgi murojaatlar soni sezilarli oshganligini pandemiya sharoiti bilan bog‘lagan. Qayd etilishicha, karantin davrida COVID-19’ni yuqtirish xavfi sababli uydan chiqishni afzal ko‘rmaganlarning aksariyati tez yordamga qo‘ng‘iroq qilgan.
“Qolaversa, shoshilinch yordam ko‘rsatish xizmatlari tizimida Call-markazlar tashkil etilib, u yerda shifokorlar ham faoliyat yuritishi va lozim bo‘lganida bemorlarga tez yordam mashinasi yetib kelgunicha telefon orqali konsultatsiya qilib, uning yonidagi insonga birinchi yordam ko‘rsatish bo‘yicha ko‘rsatmalar berib, bemorning hayotini qutqarib qolishga ko‘maklashishi aholi salomatligini muhofazalashda muhim omil bo‘lmoqda”, — deyiladi vazirlik xabarida.
Ma’lumot uchun, 2017—2018-yillar mobaynida O‘zbekiston tarixida birinchi marta tez tibbiy yordam xizmati uchun 1500 ta yangi ixtisoslashgan avtomashina xarid qilingan. 2020-yil yanvar oyida Toshkentdagi tez tibbiy yordam xizmati uchun xorijdan keltirilgan 150 ta Ford zamonaviy reanimobili foydalanishga topshirilgan. Viloyatlarda ham shunday tizimni joriy qilish rejalashtirilgan.
Izoh (0)