Jahon sog‘liqni saqlash tashkiloti (JSST) koronavirusning yangi, mutatsiyaga uchragan turlari tarqalishini sekinlashtirish va to‘xtatish uchun mamlakatlarni bor imkoniyatlarni ishga solishga chaqirdi. Bu haqda JSST rasmiy vakili Tarik Yazarevich aytib o‘tdi, deb yozadi “Kommersant”.

“Viruslar sirkulyatsiya (aylanish) chog‘ida o‘zgaradi, bu esa ularning xususiyatlari o‘zgarishiga olib keladi. Bu virus tarqalishini sekinlashtirish va oxir-oqibat to‘xtatish uchun hammamiz choralar ko‘rishda davom etishimiz kerak”, — dedi Yazarevich.

Uning so‘zlariga ko‘ra, JSST “Buyuk Britaniya va Janubiy Afrikadagi sog‘liqni saqlash rasmiylari va olimlar bilan ularda virusda aniqlagan o‘zgarishlar borasida yaqin muloqotda bo‘lib turibdi”. Uning aniqlik kiritishicha, hozir bu virus odamlar orasida qanchalik oson tarqalishi, kasallikning qay darajada og‘ir kechishiga olib kelishi hamda test va vaksinalar natijalariga ta’sir qilish-qilmasligini aniqlash kerak.

O‘tgan haftada Buyuk Britaniyada koronavirusning yangi varianti aniqlandi — dastlabki ma’lumotlarga ko‘ra, u odatdagi koronavirusdan 70 foizga yuqumliroq, lekin undan-da xavfliroq emas. Bu haqda mamlakat bosh vaziri Boris Jonson ma’lum qildi.

Infeksiyaning yangi shtammi aniqlangani munosabati bilan Angliya janubi-sharqida, xususan, Londonda 20-dekabrdan e’tiboran cheklovlarning yuqori, to‘rtinchi darajasi joriy etildi, hozircha bu tartib yaqin ikki hafta amalda bo‘ladi. Unga ko‘ra, mahalliy aholi zaruratsiz uydan chiqishi, shuningdek, Yangi yil bayrami tantanalarida bir necha oila bo‘lib to‘planishi mumkin emas. Xavfning to‘rtinchi darajasi e’lon qilingan hududlarda faqat dorixonalar va birinchi zarurat do‘konlari ishlaydi. Xuddi shunday cheklovlar 20-dekabrdan Uelsda, 26-dekabrdan esa Shotlandiyada ham joriy etiladi.

Jahon sog‘liqni saqlash tashkiloti 20-dekabr kuni Britaniyanikiga o‘xshash koronavirus Niderlandiya, Daniya va Avstraliyada ham aniqlanganini e’lon qildi. Avvalroq Janubiy Afrika Respublikasi (JAR)da ham o‘xshash mutatsiyadagi virus topilgani haqida xabar berilgan edi. Virusning yangi varianti hozirgi vaksinalar hosil qiladigan immunitetdan kuchliroq bo‘lishi mumkin, degan taxminlar uchun hozircha biror-bir asos yo‘q.

Shu munosabat bilan 20 dan ortiq mamlakat aviaqatnovlarga cheklovlar kiritdi. Avstriya, Argentina, Belgiya, Bolgariya, Germaniya, Isroil, Eron, Irlandiya, Italiya, Kanada, Kolumbiya, Kuvayt, Latviya, Litva, Marokash, Niderlandiya, Ruminiya, Turkiya, Xorvatiya, Finlyandiya, Fransiya, Chili, Chexiya, Shveysariya, Estoniya turli muddatlarga Buyuk Britaniyadan parvozlarni to‘xtatgan. Daniya vaziyatga baho berib, qanday choralar talab qilinishini tushunib olish uchun o‘z havo hududini Buyuk Britaniyadan keladigan samolyotlar uchun 48 soatga yopib qo‘ydi. Polsha 21-dekabr kuni yarim tundan samolyotlar parvozini bekor qildi. Reyslar qachon qayta tiklanishi noma’lum.