Rossiyalik 6 yoshli Anastasiya Radzinskaya ismli qizcha Forbes jurnalining eng katta daromad oluvchi YouTube-blogerlar reytingiga kiritildi, deb yozadi Meduza.
Radzinskaya yillik an’anaviy ro‘yxatning yettinchi pog‘onasini egalladi. Forbes uning yillik daromadini 18,5 million dollarga baholadi.
Radzinskaya o‘tgan yili ham Forbes reytingiga kiritilgan edi. O‘shanda u 18 million yillik daromad bilan uchinchi o‘rinni egallagan edi.
Forbes’ning yangi reytingida birinchi o‘rinni, xuddi o‘tgan yildagidek, texaslik 9 yoshli Rayan Kadji band etdi. Jurnal hisob-kitoblariga ko‘ra, uning daromadi 29,5 million dollarga teng bo‘lgan. Ikkinchi o‘rindan 24 million dollar daromad bilan 22 yoshli Jimmi Donaldson, uchinchi o‘rindan esa 23 million dollar daromad bilan Dude Perfect kanali yaratuvchilari joy oldi.
Anastasiya Radzinskayaning YouTube’dagi kanali Like Nastya deb nomlanadi. U qizchaning hayoti haqidagi vlogdir. Undagi birinchi video 2016-yilda e’lon qilingan. Hozir kanalga obuna bo‘lganlar soni 65,8 milliondan oshgan. 2018-yildan buyon Anastasiya va uning ota-onasi AQShda yashaydi.
Izoh (0)