“O‘zbekiston temir yo‘llari” 2020-yil 28-dekabrdan 2021-yil 10-yanvargacha talaba va o‘quvchilar uchun mamlakat bo‘ylab chipta narxlariga 50 foizlik chegirma e’lon qildi.
Qayd etilishicha, chegirma talaba va o‘quvchilarning qishki o‘quv ta’tilini maroqli o‘tishida hamda mamlakatning qadimiy shaharlariga sayohat qilishlariga qulaylik yaratish maqsadida amalga oshirilgan.
Kompaniyaning ma’lum qilishicha, 2020-yil 28-dekabrdan 2021-yil 10-yanvargacha oliy o‘quv yurtlarining kunduzgi bo‘limlarida ta’lim olayotgan talabalar hamda o‘quvchilarga poyezd chiptalarida chiptaning ta’rif qismidan 50 foiz miqdorida chegirma beriladi.
Ushbu chiptalar imtiyozli bo‘lganligi uchun ularni faqat temiryo‘l kassalaridan xarid qilish mumkin. Qo‘shimcha ma’lumotni Toshkent shahridagi 1005 qisqa telefon raqami, joylardagi temiryo‘l kassalari hamda ma’lumotlar byurosidan bilib olish mumkin.
Avvalroq O‘zbekistonda talabalar 28-dekabrdan qishki ta’tilga chiqishi ma’lum qilingandi.
Izoh (0)