Rossiyada “Ponton” nomli o‘ta noyob Mercedes-Benz sotuvga qo‘yildi

Rossiyada old va orqa qanotlarining dizayni sabab “Ponton” laqabini olgan model — 1959-yilda ishlab chiqarilgan Mercedes-Benz 220 SE (W128) kabrioleti sotuvga qo‘yildi. O‘tgan asrning o‘rtalarida yig‘ilgan 1112 nusxadan biri Tverdan topilgan: 50 ming kilometr yo‘l bosib, ideal holatda saqlangan model 14,7 million rublga (200 ming dollar) baholanmoqda, deb xabar beradi Motor.

E’lon muallifi 61 yillik “Ponton”ni hozirgi Mercedes-Benz S-Class’ni “bobosining bobosi” deb atagan. Mazkur nusxa Germaniyada restavratsiya qilingan va shundan so‘ng Rossiyaga olib kelingan, YHXBBda ro‘yxatga olingan. Kabrioletga olti silindrli 2,2 litrli benzin dvigatel o‘rnatilgan bo‘lib, agregat 120 ot kuchini taqdim etishga qodir. U mexanik uzatmalar qutisi yordamida boshqariladi.

Modelga “Ponton” nomi old va orqa qanotlarning kuzovga uyg‘unlashib ketgani sabab bo‘lgan. Bu kabi dizayn XX asrning o‘rtalaridagi qator modellarga xos bo‘lgan. Versiyalardan biriga ko‘ra, ushbu so‘z nemis tankchilaridan qolgan bo‘lib, ular Ikkinchi jahon urushi vaqtida yon tomonlariga zirhli ekranlar ilingan tanklarni “Ponton” deb atagan.

Avvalroq Elvis Presliga tegishli bo‘lgan Mercedes-Benz 600 (W100) sotuvga qo‘yilgani to‘g‘risida xabar berilgandi.