Samarqandda aholi bandligiga ko‘maklashish markazi direktori soxta hujjat tayyorlab, 224 mln so‘mni o‘zlashtirgani ma’lum bo‘ldi

Samarqand viloyatining Pastdarg‘om tumani aholi bandligiga ko‘maklashish markazi direktori Sh.Sh. markazning 33 nafar moddiy yordamga muhtoj bo‘lmagan xodimi nomidan soxta hujjatlar tayyorlab, bankka taqdim qilgan va mukofot puli sifatida jami 224 million so‘m naqd pullarni noqonuniy o‘zlashtirgan. Bu haqda “Daryo”ga viloyat prokurori Ravshan Masharipov ma’lum qildi.

Shuningdek, markaz direktori Sh.Sh. ikki nafar xodimi bilan kambag‘al oilalar toifasiga kirmagan 26 nafar fuqaroga issiqxona qurish va suv nasoslari olish uchun 99 million so‘m subsidiya mablag‘lari berilganligi haqida soxta hujjat tuzgan va yana pul o‘zlashtirgan.

Viloyat prokurorining qo‘shimcha qilishicha, so‘nggi ikki yilda tizimdagi 5 nafar xodim turli korrupsiyaviy jinoyatlari uchun javobgarlikka tortilgan.