O‘zbekiston prokuratura xodimlari ijtimoiy ahamiyatga ega bo‘lgan oziq-ovqat mahsulotlari narxlarini manipulyatsiya qilish, ularga bo‘lgan sun’iy tanqislikni vujudga keltirishga qarshi kurashish orqali narxlarning barqarorligini ta’minlash maqsadida mamlakatda faoliyat yuritayotgan dehqon bozorlariga biriktirildi. Bu haqda Bosh prokuratura xabar qildi.
Ma’lum qilinishicha, mamlakat dehqon bozorlariga prokuratura xodimlari biriktirilib, ular doimiy asosda narxlarning barqarorligini ta’minlash, ishlab chiqaruvchilarni dehqon bozorlariga to‘sqinliksiz kirib kelishi hamda bu boradagi korrupsiyaga qarshi kurashish tadbirlarini amalga oshirmoqda.
Narxlarning doimiy o‘rganilishi natijalari bo‘yicha narx oshishi ehtimoli yuqori bo‘lgan hududlarga 220 ming tonna mahsulotlar keltirilib, narxlar mo‘tadillashtirib borilgan.
Shuningdek, dehqon bozorlarida 1830 ta rasta va savdo nuqtadan iborat oziq-ovqat mahsulotlarining arzonlashtirilgan yarmarkalari tashkil etilib, ularda mahsulotlar boshqa rastalarga nisbatan arzon sotilmoqda.
Prokuratura axborot xizmatining ma’lum qilishicha, ko‘rilayotgan bu kabi choralar narxlarning asossiz oshib ketishining oldini olishga xizmat qilmoqda.
Ta’kidlanishicha, qish—bahor mavsumida zaxira tadbirlarini tashkil etishning moddiy asoslari yaratilib, tasdiqlangan grafikka muvofiq, mahalliy hokimliklar tomonidan bugungi kun holati bo‘yicha 791,4 ming tonna yoki rejaga nisbatan 99,6 foiz asosiy turdagi oziq-ovqat mahsulotlarining zaxirasi jamg‘arilgan.
Aholiga qulaylik yaratish maqsadida kichik ekobozorlarni tashkil etish bo‘yicha zarur yer maydoni ajratilib, tarmoq jadvallariga muvofiq 10-dekabr holatiga ko‘ra ularning 363 tasi foydalanishga topshirildi.Narxlarni asossiz oshirish holatlariga nisbatan o‘tkazilgan tadbirlar natijasida mahsulotni qimmat sotilishining oldi olinib, jiddiy qonunbuzilish holatlari bo‘yicha jinoyat ishlari qo‘zg‘atilmoqda.
Qayd etilishicha, hozirda mahalliy hokimliklar bilan birgalikda Yangi yil bayrami arafasida arzonlashtirilgan mahsulotlar yarmarkasi o‘tkaziladigan joylar belgilanib, dehqon-fermerlarni biriktirish ishlari amalga oshirilmoqda.
Oziq-ovqat mahsulotlari narxlarining barqarorligini ta’minlash bo‘yicha ishlar prokuratura organlari tomonidan alohida nazoratga olingan.
“Yangi yil bayrami arafasida ijtimoiy ahamiyatga ega bo‘lgan oziq-ovqat mahsulotlari taqchilligining vujudga kelmasligi hamda narxlarning mo‘tadil saqlanishini ta’minlashga prokuratura organlari kafolat beradi.
Fuqarolar asosiy turdagi oziq-ovqat mahsulotlari narxlarining asossiz ravishda oshirilish holatlariga, shuningdek, ishlab chiqaruvchilar, fermerlar, dehqon xo‘jaliklari hamda tomorqa yer egalari dehqon bozorlarida o‘z mahsulotlarini sotishda turli to‘siqlarga duch kelgan taqdirda Bosh prokuratura huzuridagi Departamentning 71 233 10 07 raqamli ishonch telefoniga murojaat qilishlari mumkinligini eslatib o‘tamiz”, — deyiladi prokuratura xabarida.
Avvalroq Samarqanddagi “loy bozor”ning kamchiliklari internetda tarqalgan foto va videolar sabab bir kunda bartaraf etilgani hamda Chorsuda Milliy gvardiya xodimlari bir yigitni kuch ishlatib olib ketishga uringani, ammo aholi qarshiligiga duch kelgani haqida xabar berilgandi.
Izoh (0)