“Rosselxoznadzor” 14-dekabrdan boshlab Armanistonning Armavir viloyatida yetishtirilgan pomidor va qalampirlarning Rossiya hududiga olib kirilishini taqiqlab qo‘ydi. Bu haqda idora saytida e’lon qilingan xabarda so‘z boradi.
Ushbu qaror Armavir viloyatida yetishtiriladigan sabzavotlarda pepino mozaikasi virusi aniqlangani sabab qabul qilingan. Fitosanitariya nazorati virusni oktabr oyida aniqlagan.
“‘Rosselxoznadzor’ bilan o‘tkazilgan uchrashuv yakunlariga ko‘ra, Rossiya sabzavotlarni olib kelishga mas’ul idoralardan nazoratni kuchaytirish, shuningdek, tekshiruv natijalari va amalga oshirilgan fitosanitariya choralari bo‘yicha ma’lumot berish so‘raldi”, — deyiladi xabarda.
“Rosselxoznadzor”ning ta’kidlashicha, Armaniston tomoni hozircha mazkur holatga hech qanday javob qaytarmagan, bu esa “Armaniston fitosanitariya nazorati tizimining Rossiyaga pepino mozaika virusidan holi mahsulotlarni olib kirishni ta’minlashga tayyor emasligidan dalolat berishi mumkin”.
Ma’lumotlarga ko‘ra, 2020-yilda Armaniston Rossiyada jami 21,8 million dollarlik 20,3 ming tonna pomidor sotgan. 2019-yil yakunlari bo‘yicha, Armaniston Rossiyaga pomidor import qiluvchi davlatlar orasida sakkizinchi o‘rinni egallagan.
Avvalroq “Rosselxoznadzor” 10-dekabrdan Ozarbayjonda yetishtirilgan pomidor va olmalarning Rossiyaga olib kirilishini taqiqlashi ma’lum bo‘lgandi. Bunga ushbu mahsulotlarda zararkunandalar topilgani sabab bo‘lgan.
Mavzuga doir:
Izoh (0)