“Real” Chempionlar Ligasi tarixida ilk bor guruhdan chiqa olmasligi mumkin. B guruhidagi holat haqida

Chempionlar Ligasining B guruhida 9-dekabr, chorshanba tunida so‘nggi tur o‘yinlari o‘tkaziladi.

Ayni damda guruh quyidagi ko‘rinishni olgan:

1. “Borussiya M” — 8 ochko
2. “Shaxtyor” — 7
3. “Real” — 7
4. “Inter” — 5

Zinedin Zidan qo‘l ostidagi “Real” 6-turda o‘z uyida “Borussiya M”ga qarshi o‘ynaydi. “Inter” esa “Shaxtyor” bilan bahs yuritadi. Madridliklar keyingi bosqichga yo‘l olish uchun g‘alaba qozonsa bas, biroq unday bo‘lmagan taqdirda guruhdagi holat qanday ko‘rinish olishi haqida gaplashamiz.

Madridliklarni mag‘lubiyat umuman qoniqtirmaydi. Agar “Real” mag‘lubiyatga uchrasa va guruhdagi ikkinchi o‘yinda  “Shaxtyor” ham yutqazib qo‘ysa, u holda Zidan shogirdlari guruhda so‘nggi o‘rinni egallaydi. “Inter” mag‘lubiyatga uchraydigan bo‘lsa yoki durang qayd etsa, “Real” Yevropa Ligasiga ravona bo‘ladi.

Durang natija ham “Qirollik klubi”ni pley-offga olib chiqishi mumkin. Biroq buning uchun ikkinchi o‘yinda “Inter” g‘alaba qozonishi kerak. Shunda Madrid va Milan jamoalarining ochkolari bir xil ko‘rinish oladi, “Real” esa o‘zaro o‘yinlardagi ustunlik evaziga keyingi bosqichga chiqadi.

Barcha uchrashuvlarda durang qayd etilgan taqdirda “Shaxtyor” o‘zaro o‘yinlardagi ustunlik bois “Real”dan oldinda bo‘ladi. “Borussiya M” ham o‘z o‘rnini saqlab qoladi.

“Real” g‘alaba qozongan taqdirda kamida ikkinchi o‘rin masalasini hal qiladi. Agar guruhning keyingi o‘yinida “Shaxtyor” ochko yo‘qotsa, u holda madridliklar birinchi o‘rin bilan 1/8 finalga yo‘l oladi.

Xullas, so‘nggi tur oldidan barchada imkoniyat bor, faqatgina “Inter” keyingi bosqich masalasini hal qilish uchun o‘zi zafar quchish bilan birga, parallel o‘yin natijasi bilan hisoblashishga majbur.

Mazkur o‘yinlar 9-dekabrdan 10-dekabrga o‘tar kechasi 01:00 da boshlanadi.