Hakamni tepgan futbolchi 10 yilga chetlatildi, “Neftchi” 100 mln so‘m jarimaga tortildi. O‘FA “Neftchi” — “Turon” uchrashuvidagi holat bo‘yicha qaror chiqardi

O‘zbekiston futbol assotsiatsiyasi (O‘FA) Pro-Liga so‘nggi tur doirasida o‘tgan “Neftchi” — “Turon” uchrashuvidan keyin sodir bo‘lgan holatlar bo‘yicha tartib-intizom qo‘mitasi qarorlarini e’lon qildi.

“Istiqlol” stadionida o‘tgan mazkur bahsning yakunida mezbon futbolchilar tomonidan Shavkat Nasibullayev boshchiligidagi uchrashuv hakamlariga nisbatan qo‘pol va tajovuzkor munosabatda bo‘lib, ularga tan jarohati yetkazilgandi.

O‘FA mutaxassislaridan iborat maxsus ishchi guruh Ichki ishlar vazirligi, “Neftchi” — “Turon” uchrashuvining tashkiliy ishlariga mas’ul barcha tashkilotlar bilan hamkorlikda uchrashuvda yuzaga kelgan mojaro bo‘yicha surishtiruv ishlari olib bordi.

Har bir holat bo‘yicha surishtiruv ishlari yakuniga yetgach barcha kerakli ma’lumotlar, shuningdek, o‘yin qaydnomasi, uchrashuv nazoratchisi va komissarining bildirgilari, ommaviy tartibsizlik aks etgan videomateriallar O‘FA tartib-intizom qo‘mitasiga taqdim etilgan.

Tartibsizlikni ko‘rib chiqish va aybdorlarga chora ko‘rish masalasi tartib-intizom qo‘mitasining yig‘ilishida atroflicha muhokama etildi hamda tegishli qarorlar qabul qilindi:

• “Neftchi” klubi futbolchisi Jamshid To‘raqulov uchrashuv bosh hakami Shavkat Nasibullayevga qasddan tan jarohati yetkazgani uchun unga nisbatan O‘FA Intizom kodeksining 5.6 va 5.49-bandlariga asosan 10 yil muddatga futbol bilan bog‘liq har qanday faoliyat bilan shug‘ullanishdan chetlatish intizom chorasi qo‘llandi;
• “Neftchi” klubi futbolchilari Abduraimov, Zokirov va Qobulov uchrashuv bosh hakamiga hujum qilganligi uchun ularning har biri O‘FA Intizom kodeksining 5.48-bandiga asosan 1 yil muddatga futboldan chetlatildi va 15 million so‘mdan jarimaga tortildi;
• “Neftchi” klubi futbolchisi Toshmatov uchrashuv yordamchi hakami Saylavovga nisbatan tajovuzkor harakat qilganligi uchun Intizom kodeksining 5.49-bandiga asosan 10 ta rasmiy uchrashuvga diskvalifikatsiya qilindi;
• Uchrashuv yakunlangandan so‘ng muxlislar futbol maydonida va unga yondosh hududlarda tartibsizliklar keltirib chiqargani, “Neftchi” futbol klubi mas’ullari jamoat tartibini saqlash bilan bog‘liq yetarlicha choralar ko‘rilishini ta’minlamagani uchun “Neftchi” futbol klubiga nisbatan Intizom kodeksining 5.4-bandiga asosan 3 ta uy uchrashuvini muxlislarsiz o‘tkazish va 100 million so‘m miqdorida jarima intizom chorasi qo‘llandi;
• Uchrashuvdan so‘ng stadionga tashrif buyurgan tomoshabinlar tomonidan futbol maydonida va unga yondosh hududlarda tartibsizliklar keltirib chiqarilishi holatini muhokama qilish hamda “Istiqlol” stadioni ma’muriyatiga chora ko‘rish bo‘yicha Farg‘ona viloyati IIBga taqdimnoma yuborildi.