Braziliyada xavfli zamburug‘ga chalinish bo‘yicha birinchi holat aniqlandi

Braziliya hududida odamning dorilarga chidamli bo‘lgan va o‘limga olib kelishi mumkin bo‘lgan Candida auris zamburug‘iga chalinishi bilan bog‘liq ilk holat qayd etildi, deb yozadi “RBK” Braziliyaning sanitar nazorat bo‘yicha Anvisa tashkilotiga tayanib.

Anvisa ma’lumotlariga ko‘ra, Candida auris birinchi marta 2009-yilda Yaponiyadagi bir bemorda aniqlangan. Uning ba’zi shtammlari zamburug‘ga qarshi dorilarning asosiy uchta sinfining barchasiga ham chidamli hisoblanadi, bu zamburug‘ni faqat maxsus laboratoriya usullari orqali aniqlash mumkin.

Anvisa barcha sog‘liqni saqlash xizmatlariga zamburug‘ ustidan laboratoriya nazoratini kuchaytirishni tavsiya qildi.

Eslatib o‘tamiz, Hindiston janubidagi Eluru shahrida 5-dekabrdan buyon bir kishi noma’lum kasallikdan vafot etgan, yana 848 kishida shu kasallik belgilari aniqlangan. Bemorlar bosh aylanishi, bosh og‘rig‘i, tutqanoq tutishidan shikoyat qilmoqda. Hukumat qayd etishicha, kasallik odamdan odamga yuqmaydi. Times of India ma’lumotlariga ko‘ra, zaharli xlororganik birikmalar va chivinga qarshi vositalar ham sababchi bo‘lgan bo‘lishi mumkin. Dastlabki ma’lumotlarga ko‘ra, bunga zaharlanish sabab bo‘lgan, u COVID-19’ga aloqador emas.

Noyabr oyida Senegalda o‘nlab baliqchilar ochiq okeanda noma’lum kasallikni yuqtirib olgan edi. O‘shanda Senegalda (G‘arbiy Afrikada joylashgan) 200 ga yaqin kishi noma’lum kasallikka chalingan, ular ochiq okeanda uni yuqtirib olgani taxmin qilingan edi.