Alp tog‘laridagi uy, qimmatbaho mashinalar va Ronaldu bilan do‘stlik. “Yuventus” yulduzi Paulo Dibala qanday hayot kechiradi?

Turinning “Yuventus” klubi hujumkor yarim himoyachisi Paulo Dibala o‘zining yorqin yorqin o‘yinlari bilan allaqachon futbol ixlosmandlarining qalbidan joy olib ulgurgan. Tabiiyki, ko‘pchilikni uning yashil maydondagi harakatlaridan tashqari, qanday hayot kechirishi ham qiziqtiradi. Quyida aynan Paulo Dibalaning qanday hayot kechirishi haqida hikoya qilamiz.

Dibala qayerda yashaydi?

Dibalaning uyi ham o‘zi kabi zamonaviy va noodatiy uslubga ega. Imoratdan shundoqqina Alp tog‘lari manzarasini tomosha qilish mumkin.

Aksariyat futbolchilarda bo‘lgani kabi argentinalikning uyida ko‘plab xonalar va suzish havzalari mavjud. Shuningdek, uyda alohida bilyard xonasi ham bor.

Uyning qiymati qanchaligi haqida aniq ma’lumot yo‘q, biroq uning qimmatbaho ekanligiga hech qanday shubha bo‘lishi mumkin emas.

Dibala qanday mashinalarda yuradi?

Mashinalar borasida ham Pauloni kamtar deb bo‘lmaydi — uning garajidan naq 4 ta hashamatli avtoulov o‘rin olgan. Bular: Jeep Grand Cherokee 4x4 (90 ming dollar), Ferrari F12 Berlinetta (500 ming dollar), Range Rover (200 ming dollar) va Audi A1 (35 ming dollar).

Dibalaning do‘stlari kim?

Dibala bo‘sh vaqtlarini, asosan oilasi va yaqinlari orasida o‘tkazadi. Shunga qaramay Krishtianu Ronaldu Turin klubiga o‘tgach, ular o‘zaro do‘stlashib qolgan.

Tabiiyki, bu maydonda ham bu o‘z isbotini topmasdan qolmadi: futbolchilar bir-birini juda yaxshi tushunadi va gollarni ham birgalikda nishonlaydi.

Dibala futboldan tashqari yana nimalarga qiziqadi?

Yuqorida ta’kidlanganidek, Dibala ko‘p vaqtini oilasiga ajratadi. Shunga qaramay, u sevimli mashg‘ulotlariga ham vaqt topadi. Paulo mashg‘ulot va o‘yinlardan bo‘sh vaqtlarida stol tennisi, bilyard, Lego va shaxmat o‘ynashni xush ko‘radi. Uning aytishicha, shaxmat va futbolning o‘ziga xos o‘xshash tomonlari bor.

Shuningdek, Dibala uysizlarga ham muntazam ravishda yordam ko‘rsatib keladi. U Italiyada ommalashgan mehr-saxovat aksiyalarining faol ishtirokchisi hisoblanadi.