Andijonda tanishining xotini bilan “yurgan” prokuror yordamchisi lavozimidan ozod etildi

Internetda Andijon viloyati Andijon tumani prokuraturasi prokurorning katta yordamchisi lavozimida ishlab kelayotgan A.O. boshqa birovning nikohidagi ayoli bilan ko‘ngilxushlik qilib yurgani to‘g‘risidagi ma’lumotlar tarqaldi. Bosh prokuratura matbuot xizmati “Daryo”ning ushbu masala yuzasidan yo‘llagan so‘roviga A.O. egallab turgan lavozimidan ozod etilganini ma’lum qildi.

Ma’lumotlarga ko‘ra, A.O. Toshkent davlat yuridik universiteti va Bosh prokuratura akademiyasini bitirgan. Yoshlar ittifoqining faol a’zolaridan biri hisoblanadi. “Shuningdek, u tabiatan OAV va ijtimoiy tarmoqlarda balandparvoz chiqishlar qilib turishni yoqtiradi. U o‘ziga tanish bo‘lgan shaxsning turmush o‘rtog‘i bilan uzoq muddat ishqiy munosabatda bo‘lib kelgan”, — deyiladi ijtimoiy tarmoqlarda tarqalgan xabarda.

Bosh prokuratura matbuot xizmatining ma’lum qilishicha, Andijon tumani prokurori katta yordamchisi A.O. viloyat prokurorining 5-dekabrdagi 308-sonli buyrug‘iga ko‘ra, lavozimidan ozod etilgan.

Idora matbuot xizmati rahbari tizimda professional salohidan tashqari shaxsiy hayot masalasiga ham qattiq e’tibor berilishi, axloqi so‘roq ostidagi kadrdan darhol voz kechilishi mutlaqo tabiiy hol ekanini qayd etgan.