Dunyoga kelgan chaqaloqning kelajakda kim bo‘lishi va mashhurlikka erishishini tasavvur qilish qiyin. Iste’dod yoki qobiliyat qanchalik mujassam bo‘lmasin, u yoki bu odamning muvaffaqiyatga erishishiga ota-onaning xizmati va ta’siri beqiyos bo‘ladi. Quyida hind kinosida o‘z o‘rniga ega bo‘lgan mashhurlarning dunyoga kelishiga sababchi bo‘lgan insonlar kim ekani haqida ma’lumot berib o‘tamiz.

Ayshvariya Ray

Dunyo go‘zali Ayshvariyaning ota-onasi kino san’atidan yiroq insonlar. Otasi Krishnaray Ray savdo-floti ofitseri. Onasi esa o‘zini farzandlariga bag‘ishlagan va bo‘sh vaqtida kitob yozib turgan. Otasi harbiy bo‘lgani sabab ular Mangalorda dong‘i chiqqan oilalardan bo‘lgan. Bu esa farzandlarga yaxshi ta’lim berish va o‘qitish imkonini bergan. Bolaligidan klassik musiqa va raqs bilan shug‘ullangan Ayshvariya, Bombeyga ko‘chib kelganidan keyin nufuzli Arya Vidya Mandir kollejida xorijiy tillarni o‘rgangan. Shunga qaramay, karyerasini modellik va aktrisalikda davom ettirishga qaror qilgan.

Dipika Padukone

Daniyada dunyoga kelgan Dipikaning oilasi u tug‘ilganidan keyin Hindistonga qaytib kelgan. Aktrisaning onasi Ujalla tur-agent, otasi Prakash esa badminton bo‘yicha professional sportchi bo‘lgan. U 1980-yil Angliyadagi ochiq chempionatda g‘olib deb topilgan va bu hind sportchilari tomonidan qayd qilingan ilk natija edi. Bundan tashqari 1981—1983-yillarda bronza va oltin medallarni qo‘lga kiritgan.

Anushka Sharma

Anushkaning otasi Ajay Kumar ham harbiy bo‘lgan, onasi esa Ayshvariyaniki singari farzandlar tarbiyasi bilan shug‘ullangan. Anushkaning akasi Karnesh ham savdo flotida xizmat qiladi.

Priyanka Chopra

Priyankaning ota-onasi Ashok va Madxu Chopralar harbiy shifokor bo‘lgan. Ularning xizmat yuzasidan shaharma-shahar yurishi esa qizining o‘quv muassasasi tez-tez o‘zgarishi va o‘rta maktabni AQShda tugatishiga sabab bo‘lgan. Priyanka oilada yolg‘iz farzand emas, uning kichik ukasi bor. Otasi 2013-yilda saratondan vafot etgan.

Bipasha Basu

Bipasha Nyu-Delida dunyoga kelgan. Uning Bidisha va Bidjoeta ismli opalari bor. Otasi Xirak Basu muhandis bo‘lib ishlagan. Onasi Mamta esa uy bekasi bo‘lgan va qizlar tarbiyasi bilan shug‘ullangan.