O‘zbekiston aeroportlarida yo‘lovchilarning o‘zini mustaqil ro‘yxatdan o‘tkazish tizimi joriy etilmoqda
O‘zbekistondagi barcha xalqaro aeroportlarda bosqichma-bosqich yo‘lovchilarning mustaqil o‘zini ro‘yxatdan o‘tkazish — Self check-in tizimi joriy etilmoqda. Bu haqda Uzbekistan Airports matbuot xizmati xabar berdi.
Ushbu tizim Shveysariyaning SITA kompaniyasi tomonidan ishlab chiqilgan bo‘lib, hozirda Islom Karimov nomidagi Toshkent xalqaro aeroportiga 4 ta shunday kiosklar o‘rnatilgan. O‘zini o‘zi ro‘yxatdan o‘tkazish yo‘lovchilarga samolyotning istalgan o‘rindig‘idan joyni band etish va bir vaqtning o‘zida joylashish haqidagi talonni ham olish imkonini beradi. Rejaga ko‘ra, bu amaliyot tizimli ravishda O‘zbekistondagi 11 ta xalqaro aeroportning hammasiga tatbiq etiladi.
Sayohatga otlanganlar yuklarini kioskdan mustaqil ro‘yxatdan o‘tkazib, parvozdan avval ularni tegishli xizmatlarga topshirish imkoniyatlari mavjud.
Uzbekistan Airports aksiyadorlik jamiyati Toshkent xalqaro aeroportiga muntazam parvozlarni amalga oshirayotgan barcha aviakompaniyalarga Self check-in kioskalariga ulanish, xizmatdan samarali foydalanish taklifini kiritgan.
“Pandemiya cheklovlari tufayli hozir bu kiosk xizmatlaridan faqatgina Turkish Airlines aviakompaniyasi yo‘lovchilari foydalanmoqda. Imkoniyatlar birgina bu emas, Uzbekistan Airports AJ va Toshkent xalqaro aeroporti hozirda SITA kompaniyasi bilan yo‘lovchilarning yuklarini ham avtomatik ro‘yxatdan o‘tkazish Self BagDrop tizimini yo‘lga qo‘yish bo‘yicha muzokaralar olib boryapti”, — deyiladi xabarda.
Avvalroq Uzbekistan Airports 2019-yilda 4,3 milliard so‘m zarar ko‘rgani ma’lum bo‘lgandi.
