“U o‘zini italiyalik futbol bilimdoni deb hisoblaydi, aslida esa ko‘p narsani tushunmaydi”. Shomurodovning agenti Eldorni tanqid qilgan hamkasbiga javob qaytardi

“Jenoa” hujumchisi Eldor Shomurodovning agenti Qahhor Mo‘minov o‘zbekistonlik futbolchi borasida tanqidiy fikrlarga o‘z munosabatini bildirdi.

Avvalroq italiyalik futbol agenti Marko Trabukki “Jenoa” 25 yoshli futbolchini sotib olib, katta xatoga yo‘l qo‘ygani haqida gapirgandi.

“Marko, balki, yomon menejer emasdir, biroq futbol kam ko‘radi va bu borada tushunchasi past. U o‘zini italiyalik futbol bilimdoni sanaydi. Klubdan bo‘shatilgan sobiq direktor bilan suhbat quradi va bu bo‘lmag‘ur fikrlari aytadi.

Eldorning moslashuv jarayonida o‘sish bor, afsuski, u uch hafta jarohat sabab maydonga tusha olmadi. O‘tgan kuni Genuya derbisida asosiy tarkibda tushdi, yaxshi o‘ynadi, Skamakkaning goliga assistentlik qildi. Umuman olganda ishlar reja bo‘yicha ketmoqda.

Roman Yeryomenko — ajoyib futbolchi va Eldorga “Rostov”da katta yordam bergan. Biroq u Shomurodovga bor-yo‘g‘i ikki bor golli uzatma bergan, xolos”, — deydi Mo‘minov.

Roman Yeryomenko Trabukkining mijozi hisoblanadi. Avvalroq u Eldor haqidagi iqtibosida shundan degandi: “Shomurodovga juda ko‘p hujum qiladigan klub kerak. Roman Yeryomenko kabi ajoyib uzatmalar qilib beradigan sherik zarur”.

Ma’lumot uchun, Trabukki Italiyada tug‘ilgan bo‘lsa-da, uning kelib chiqishi Qozog‘istondan va uning onasi rossiyalik.

Shomurodov A Seriya joriy mavsumida uchta o‘yin o‘tkazib birorta ham samarali harakat amalga oshira olmadi. Italiya Kubogi 1/16 finali doirasida o‘tgan “Sampdoriya“ga qarshi o‘yinda (3:1) Eldor golli uzatmaga mualliflik qildi.