Turkmanistonda 2021-yildan boshlab ba‘zi bosma gazeta va jurnallar birlashtiriladi, ular raqamli formatga o‘tkaziladi, qog‘oz ko‘rinishdagi nashrlarga obuna esa faqar pensionerlar uchun qoldiriladi. Bu qog‘oz va pulni tejash, shuningdek, bir xil ma’lumotni takrorlovchi nashrlarni qisqartirish uchun amalga oshirladi. Bu haqda ORIENT agentligiga tayanib, “Interfaks” xabar berdi.
Prezident Gurbanguli Berdimuhamedov 26-noyabr kuni o‘tkazilgan hukumat yig‘ilishida bu takliflarni ma’qullagan va OAVni elektron formatga o‘tkazishni tezlashtirish bo‘yicha topshiriq bergan. Prezidentning so‘zlariga ko‘ra, bu turkman OAVlarini raqamlashtirishning yo‘nalishlaridan biri sanaladi, raqamlashtirishning maqsadi esa OAVlarni zamonaviy standartlar darajasiga olib chiqish hisoblanadi.
ORIENT agentligining yozishicha, “mamlakatda chiqadigan gazeta va jurnallarning asosiy qismi endi elektron versiyaga ega bo‘lgani va elektron obuna imkoniyati mavjudligi sababli, ularning qog‘oz tirajlari va mazmunan o‘xshashligi kun tartibiga chiqdi”. Agentlikning qo‘shimcha qilishicha, internet va mobil dasturlarning rivojlanishi bilan gazetalarni o‘qish charchatadigan bo‘ldi, ularning savdosi pasaymoqda, reklama beruvchilar ham bosma matbuotdan internetga o‘tishni boshladi.
Shu sababli mamlakat hukumati mavzu jihatdan o‘xshash nashrlarni birlashtirishga va shu orqali pulni tejashga qaror qildi. “Mugallymlar gazeti” (“O‘qituvchilar gazetasi”) va “Türkmen dili” (“Turkman tili”) gazetalari tahririyatlarini birinchi nashr nomi ostida birlashtirish taklif etilmoqda. Shuningdek, “Watan” (“Vatan”) va “Galkynyş” (“Qayta tug‘ilish”) gazetalari birlashtiriladi va bu 120 tonna qog‘ozni tejashga imkon beradi. “Diýar” va “Qayta tug‘ilish” jurnallarining birlashtirilishi 3,7 tonna qog‘ozni tejashga imkon beradi.
Xabar berilishicha, birlashtirilayotgan nashrlar xodimlari ishdan bo‘shatilmaydi.
Agentlikning qo‘shimcha qilishicha, gazeta va jurnallarning narxi biroz oshiriladi. Nafaqaxo‘rlardan tashqari barcha 2021-yilda nashrlarning faqat elektron talqiniga obuna bo‘lishi mumkin.
Ashxoboddagi pochta bo‘limi xodimlarining 2021-yil uchun Turkmanistondagi gazeta va jurnallarga obuna bo‘lish ishtagidagi kishilarga tushuntirishicha, yarim yil uchun elektron obuna 60 manat (Turkmaniston Markaziy banki kursi bo‘yicha taxminan 17 dollar) turadi. Bunda obuna faqat ulgurji amalga oshiriladi — birdaniga Turkmanistonda chiqadigan barcha gazeta va jurnallarga. Ular qatoridan 21 ta markaziy va hududiy gazeta hamda sakkizta jurnal o‘rin olgan.
Barcha davriy nashrlarni o‘qish imkoniyati maxsus dastur orqali beriladi. Dasturni smartfon yoki kompyuterga o‘rnatish kerak bo‘ladi.
Rus tilida nashr etiladigan “Neytralniy Turkmenistan” gazetasining yarim yillik obunasi pensionerlar uchun qog‘oz shaklida 18 manat (taxminan 5 dollar) turadi.
Izoh (0)