Eron hukumati mamlakat Mudofaa vazirligi ilmiy-tadqiqot va innovatsiya tashkiloti rahbari Muhsin Faxrizodaning o‘ldirilishiga javob qaytarishga va’da berdi. Bu kabi bayonot bilan Eron oliy yetakchisining maslahatchisi Husayn Dehqon chiqish qilgan, deb xabar beradi Mehr agentligi.
“Biz shahidning qotillariga yashin kabi urilamiz”, — deydi u.
Shuningdek, Eron prezidenti Xasan Ruhoniy ham yadro fizigining o‘limi javobsiz qolmasligini ma’lum qilgan. “Mazkur jinoyat javobsiz qolmaydi, o‘z vaqtida unga javob qaytariladi”, — deydi Ruhoniy.
Avvalroq Faxrizoda mashinasiga terrorchilar hujum qilgani to‘g‘risida xabar berilgandi. Olim uning qo‘riqchilari va hujumchilar o‘rtasidagi otishmada jiddiy jarohat olgan va keyinchalik kasalxonada vafot etgan.
Faxrizoda Eron yadro dasturining yetakchi ishlab chiqaruvchilardan biri edi, 2018-yilda Isroil bosh vaziri Binyamin Netanyaxu olimni Tehronning barcha yadro loyihasining rahbari ekanligini aytgan. OAVlar uni “Eronlik Oppengeymer” va “Eron bombasining otasi” deb atagan. Qayd etish joizki, Eronda yadro quroli hozircha yaratilmagan.
Izoh (0)