“Bunyodkor” futbol klubi rahbariyati so‘nggi uch yilda yuz bergan iqtisodiy jinoyatlar masalasini ko‘rib chiqishni so‘rab Prezident portaliga murojaat qilgan, deya xabar qilmoqda “Championat.asia”.
Ta’kidlanishicha, bunda gap katta miqdordagi pullarni o‘zlashtirish haqida borayotgan bo‘lishi mumkin. Klub buxgalteriyasi smeta doirasida ajratilgan mablag‘larni o‘zlashtirib kelganligi aytilmoqda.
Portal mazkur murojaatni ko‘rib chiqish uchun O‘zbekiston futbol assotsiatsiyasiga (O‘FA) yuborgan. O‘FA esa qonun doirasida ushbu ishni huquqni muhofaza qiluvchi organga oshirgan. O‘FA xodimining nashrga bu ishni Bosh prokuratura ko‘rib chiqishini ma’lum qilgan.
“Daryo” ushbu masala yuzasidan Bosh prokuraturadan izoh olishga urindi. Tashkilot matbuot xizmati rahbari Hayot Shamsutdinov esa “Bunyodkor” rahbariyati murojaati bilan ayni damda Toshkent shahar prokuraturasi shug‘ullanyotganini ma’lum qildi.
Ma’lumot uchun, 2020-yilning avgust oyida “Bunyodkor” bosh direktori Ulug‘bek Mirzayev o‘z lavozimidan ozod etilgandi. Mirzayev 2019-yilning yanvaridan buyon ushbu lavozimda ishlab kelayotgandi. Undan avval Murod Aliyev 2017-yilning may oyidan 2019-yilning yanvariga qadar “Bunyodkor” bosh direktorligi lavozimida faoliyat yuritgan. Ayni vaqtda Ayniddin G‘iyosov klub bosh direktorligi vazifasini bajaruvchi sifatida faoliyat olib bormoqda. Klub hozirda Davlat aktivlarini boshqarish agentligi tasarrufida bo‘lib turibdi.
Qayd etish joiz, “Bunyodkor” jamoasi 2020-yilda moliyaviy qiyinchiliklarni boshdan kechirmoqda. Avvalroq klub Jasur Jaloliddinovning “Lokomotiv”ga transferi borasida ham mojaroli vaziyatga uchragandi.
Mavzuga doir:
- “Jaloliddinov ishi”: “Bunyodkor” va “Lokomotiv” o‘rtasidagi vositachilar 550 ming yevroni o‘zlashtirgan
- “Bunyodkor” Jasur Jaloliddinov transferidan tushgan pulni ishlata olmayotgani ma’lum bo‘ldi
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)