Ijtimoiy tarmoqlarda 24-noyabr kuni “Sirdaryoda birovning xotinini yo‘ldan urib, ifloslik qilgan Toshkentning GAIsi qo‘lga olindi” sarlavhasi ostidagi video tarqaldi.
Videoda Toshkent viloyati IIBB Yo‘l harakati xavfsizligi boshqarmasi xodimi ekanligi aytilgan erkak Sirdaryo viloyatidagi xonadonda bir ayol bilan ushlab olingani ma’lum qilingan. Shuningdek, videoda mazkur erkakning yuzida jarohat izlari borligi ko‘ringan.
Ichki ishlar vazirligi Yo‘l harakati xavfsizligi bosh boshqarmasining xabar berishicha, mazkur videodagi ichki ishlar xodimi Toshkent viloyati IIBB YHXB xodimi A.Rahmatullayev hisoblanadi. Uning olgan tan jarohati bo‘yicha YPXB komandirining tarbiyaviy ishlar bo‘yicha o‘rinbosari tomonidan boshqarma boshlig‘i nomiga yozilgan bildirgi asosida YHXB mas’ullari tomonidan xizmat tekshiruvi o‘tkazilgan.
Tekshiruv xulosasiga ko‘ra, Prezident va Vazirlar Mahkamasining tegishli qarorlari hamda IIVning me’yoriy buyruq talablarini qo‘pol ravishda buzib, ichki ishlar organi xodimining sha’niga putur yetkazuvchi xatti-harakatlar sodir etganligi, xodimlarga nisbatan fuqarolar tomonidan salbiy fikrlar uyg‘onishiga sababchi bo‘lganligi uchun Toshkent viloyati IIBB YHXB xodimi A.Rahmatullayevning ichki ishlar organlaridan bo‘shatilishi bo‘yicha xulosa qabul qilingan.
Izoh (0)