Prezident Shavkat Mirziyoyevning Qashqadaryo viloyatiga tashrifi chog‘ida faoliyati tanqid qilingan suv xo‘jaligi vaziri Shavkat Hamrayev davlat rahbarining “hammani ishdan olasan, ishlayman degan odamni qo‘yasan” degan topshirig‘idan so‘ng viloyatda uch nafar rahbarni lavozimidan bo‘shatgan. Bu haqda vazir jurnalist va blogerlar bilan bo‘lgan muloqotda ma’lum qildi, deya xabar berdi “Daryo” muxbiri.
Vazirning ma’lumot berishicha, Qarshi magistral kanalidan foydalanish boshqarmasi boshlig‘i Laziz Rajabov, Amu-Qashqadaryo irrigatsiya tizimlari havza boshqarmasi boshlig‘i Ilhom Qurbonov hamda havza boshqarmasi tasarrufidagi “Qashqadaryo suv qurilish invest” DUK boshlig‘i Botir Rahimovlar ishdan olingan.
Prezident tanqidiga uchragan viloyat suv xo‘jaligining mas’uli Ilhom Qurbonov havza boshqarmasi boshlig‘i lavozimidan olinib, Qarshi magistral kanalidan foydalanish boshqarmasi boshlig‘i etib tayinlangan.
Eslatib o‘tamiz, Shavkat Mirziyoyev rahbarligida Qarshi shahrida bo‘lib o‘tgan videoselektorda Qashqadaryoda yerlarni noto‘g‘ri sug‘orish oqibatida mavjud ekin maydonlarining 45 foizi sho‘rlangani, ayniqsa, bu borada Muborak, G‘uzor, Nishon va Kosonda ahvol juda og‘irligi tanqid qilingandi. 38 ming gektar maydon foydalanishdan chiqib ketgani aytilib, tomchilatib sug‘orish jami sug‘oriladigan maydonning bor-yo‘g‘i 2,4 foizida joriy qilingani ta’kidlab o‘tilgandi. Shundan so‘ng davlat rahbari suv xo‘jaligi vaziri Shavkat Hamrayevga viloyatda suvga mas’ul rahbarlarni ishdan olishni buyurgandi.
Mavzuga doir:
- “Qashqadaryo eli shunga munosibmi?” Shavkat Mirziyoyev viloyat o‘z salohiyatiga mos yashamayotganini keskin tanqid qildi
- “Farg‘ona 450 mln dollar, Qashqadaryo esa 90 mln”. Shavkat Mirziyoyev ikki viloyatning meva-sabzavot eksportidagi daromadini taqqosladi
- Shavkat Mirziyoyev Qashqadaryoda “og‘ir ahvolda”gi melioratsiya, kartoshkachilik, uzumchilik uchun dasturiy mahsulotlar ishlab chiqishni taklif qildi
Izoh (0)