Daniyadagi fermer xo‘jaliklarida yashovchi koronavirus infeksiyasiga chalingan barcha qorako‘zanlar o‘ldirildi. Bu haqda Daniya Veterinariya va oziq-ovqat boshqarmasiga tayanib, Meduza xabar berdi.
Qorako‘zanlar mamlakatdagi 1100 dan ortiq fermer xo‘jaliklarining 284 tasida yo‘q qilingan. Yana 25 fermer xo‘jaligidagi hayvonlar shubha ostida turibdi.
Veterinariya va oziq-ovqat boshqarmasi 23-oktabrdan boshlab kasallangan qorako‘zanlarning qanday yo‘q qilinganligini ko‘rsatadigan infografikani e’lon qildi. Grafik koronavirus bilan kasallangani uchun qorako‘zanlar o‘ldirilgan fermer xo‘jaliklari soni va qorako‘zanlar o‘ldiriladigan fermer xo‘jaliklari sonini ko‘rsatadi.
https://twitter.com/Foedevare/status/1329042798750949377
4-noyabr kuni Daniya hukumati hayvonlarda koronavirus infeksiyasini keltirib chiqaradigan SARS-CoV-2 virusi mutatsiyasiga uchraganidan keyin mamlakatdagi barcha fermer xo‘jaliklarida qorako‘zanlar yo‘q qilinishini ma’lum qildi. Ushbu virus shtammlari organizmning koronavirusga qarshi antitanani ishlab chiqarish qobiliyatini pasaytiradi, bu esa kelajakdagi vaksinalar samaradorligini nazariy jihatdan pasaytirishi mumkin.
10-noyabr kuni Daniya hukumati fermerlardan kasal va sog‘lom holatdagi barcha qorako‘zanlarni o‘ldirishni talab qilish uchun qonuniy asosga ega emasligini tan oldi. Hukumat faqat kasallangan fermalarda qorako‘zanlarni o‘ldirishni talab qilishi mumkinligini aytdi. O‘sha kuni Daniya hukumati mamlakatdagi qorako‘zanlarni yo‘q qilish to‘g‘risidagi qarorini qo‘llab-quvvatlovchi qonun loyihasini parlamentga taqdim etdi.
Daniyadagi fermalarda koronavirus bilan kasallangan barcha qorako‘zanlar yo‘q qilinishi ortidan mamlakat oziq-ovqat, qishloq xo‘jaligi va baliq xo‘jaligi vaziri Mogens Yensen o‘z lavozimini tark etishini e’lon qildi. Avvalroq, u ba’zi fermer xo‘jaliklarida hayvonlarda koronavirus mutatsiyasi aniqlanganligi sababli mamlakatda yetishtirilgan qorako‘zanlarni yo‘q qilish to‘g‘risidagi qaror noto‘g‘ri bo‘lganligini tan olgandi.
“Bugun men bosh vazirga hukumatdan iste’foga chiqmoqchi ekanligimni aytdim. Men parlamentdagi partiyalar orasida kerakli yordamga ega emasman deb ayta olaman”, — deb yozgan vazir Twitter’da.
Daniya dunyodagi eng yirik qorako‘zan mo‘ynasi yetkazib beruvchisi hisoblanadi. Hukumatning hayvonlarni yo‘q qilish to‘g‘risidagi qaroridan oldin Daniyaning barcha fermer xo‘jaliklari turli xil hisob-kitoblarga ko‘ra, 12 dan 17 milliontagacha qorako‘zan yetishtirgan.
Izoh (0)