O‘zbekistonda koronavirus infeksiyasi ilk bor qayd etilgan 2020-yilning 15-martidan buyon kasallikni davolash bilan shug‘ullanib kelayotgan Virusologiya ilmiy tekshirish instituti klinikasi kasallik hajmining kamayishi sababli noyabr boshidan odatiy ish faoliyatiga qaytdi. Bu haqda “Xalq so‘zi Online” xabar qilgan.
200 o‘ringa mo‘ljallangan shifoxona surunkali gepatit, sirroz va boshqa turdagi infeksion kasalliklarga chalingan bemorlarga xizmat ko‘rsatadi. Shifoxona dunyo talablariga javob beradigan noyob laboratoriya qurilmalari bilan jihozlangan. Bundan tashqari klinikada kuniga 250 qatnovga mo‘ljallangan poliklinika ham ishlab turibdi.
Shuningdek, Respublika epidemiologiya, mikrobiologiya va yuqumli kasalliklar ilmiy tekshirish instituti klinikasi ham odatiy ish faoliyatiga qaytib, koronavirusdan boshqa turdagi yuqumli kasalliklarga chalingan bemorlarga tibbiy xizmat ko‘rsatishga o‘tgan.
Eslatib o‘tamiz, O‘zbekistonda 15-noyabr kuni koronavirusga chalinganlar soni rasman 70 mingdan oshgan, biroq kasallanganlar soni aslida bundan kamida ikki-uch barobar ko‘p bo‘lishi mumkin. Bungacha rasman tasdiqlangan kasallanish holatlari soni 28-mart kuni 100 dan, 7-aprel kuni 500 dan, 14-aprel kuni 1000 dan, 29-aprel kuni 2 mingdan, 14-iyun kuni 5 mingdan, 5-iyul kuni 10 mingdan, 27-iyul kuni 20 mingdan, 10-avgust kuni 30 mingdan, 26-avgust kuni 40 mingdan, 19-sentabr kuni 50 mingdan, 8-oktabr kuni 60 mingdan oshgan edi.
SSVning qayd etishicha, 16-noyabr holatiga ko‘ra shu vaqtgacha tasdiqlangan bemorlarning 67 655 nafari (96 foizi) sog‘aygan, kasallik asoratlari oqibatida vafot etganlar soni 598 nafarga yetgan (“Daryo” nashri 22-sentabrga qadar yuritgan alohida statistika bo‘yicha, qurbonlar soni kamida 19 nafarga ko‘p).
Izoh (0)