DxOMark mutaxassislari iPhone 12 Pro Max’ning asosiy kameralari ustida o‘tkazilgan testlarning batafsil hisoboti bilan bo‘lishdi, deb xabar beradi IXBT.
Model iPhone 12 Pro’dan keng burchakli kamera datchigi, optik zum imkoniyati va barqarorlashtiruvchi optikasi bilan farq qiladi. Bu kabi yaxshilanishlar o‘z mevasini bergan: iPhone 12 Pro Max 130 ball to‘plab, iPhone 12 Pro’ni ro‘yxatning to‘rtinchi pog‘onasidan tushirib yuborgan. Shunga qaramay, Apple kompaniyasining eng qimmat va zamonaviy iPhone qurilmalari ham Huawei hamda Xiaomi flagmanlaridan ortda qolgan. Ro‘yxatning uchinchi o‘rnida joylashgan Huawei P40 Pro yaqinda bu joyga chiqqaniga yarim yil to‘ladi.
iPhone 12 Pro Max suratga olish borasida 138 ball, zum imkoniyatlari bo‘yicha — 68 ball, video tasvirga olish bo‘yicha — 113 ball to‘plagan. Taqqoslash uchun, iPhone 12 Pro’ning xuddi shu ko‘rsatkichlar bo‘yicha natijasi: 135, 66 va 112 ball. Testdan ko‘rish mumkinki, Apple flagmanida asosiy e’tibor foto suratga olishga qaratilgan.
iPhone 12 Pro Max kamerasining o‘ziga xos jihati — tezkorligi va aniq avtofokusi, yaxshi yoritilgan joydagi to‘g‘ri ekspozitsiyasi, mayda detallargacha yuqori tiniqligi, videoga olishda keng dinamik diapazonga egaligi hamda samarali barqarorlashtirgich tizimi. Minus tomonlari — foto suratga olishdagi dinamik diapazonning cheklangani, suratdagi shovqinlar, ayniqsa, xira yoritilgan joylarda, HDR suratga olishdagi notabiiy ranglar, foto suratga olishda turli artefaktlar.
DxOMark’ning yozishicha, apprat eng yaxshi kameraga ega bo‘lmasa-da, o‘zidan oldingi vakillaridan barcha parametlar bo‘yicha ustun turadi.
Avvalroq iPhone 12 mini va iPhone 12 Pro Max’ning ilk egalari ijtimoiy tarmoqlar orqali o‘z taassurotlari bilan bo‘lishishni boshlagani to‘g‘risida xabar berilgandi.
Izoh (0)