Futbol bo‘yicha Millatlar Ligasining 5-tur o‘yinlari ortda qoldi. So‘nggi tur oldidan bir qator guruhlarda keyingi bosqichga yo‘l olgan yoki quyi ligaga tushib ketgan jamoalar nomi ma’lum bo‘ldi.
A1 guruhi. Bosniya va Gersegovina (2 ochko) B ligaga ravona bo‘ldi. Italiya (9) so‘nggi turda Bosniyani mag‘lub etadigan bo‘lsa, Niderlandiya (8) va Polsha (7) ortda qoldirib yarim finalga yo‘l oladi.
A2 guruhi. Islandiya (0) Daniyaga (10) yengilgach yuqori ligada jon saqlab qolish imkoniyatini yo‘qqa chiqardi. Angliya (7) esa yarim final yo‘llanmasidan quruq qoldi. Keyingi bosqich masalasi so‘nggi tur doirasidagi Daniya — Belgiya (12) uchrashuvida hal bo‘ladi.
A3 guruhi. Fransiya (13) terma jamoasi Portugaliya (10) maydonida g‘alaba qozongan holda yarim final yo‘llanmasini muddatidan avval qo‘lga kiritdi. Xorvatiya (3) va Shvetsiya (3) jon saqlab qolish uchun kurashmoqda.
A4 guruhi. So‘nggi turda Germaniya (9) va Ispaniya (8) yarim final yo‘llanmasi taqdirini hal qiladigan bahsda maydonga tushadi. Ukraina (6) va Shveysariya (3) esa liga qolish uchun kurash olib boradi.
B3 guruhi. Rossiya (8) so‘nggi turda Serbiya (3) maydoniga safar qiladi. Bu o‘yindagi g‘alaba ruslarni A Ligaga olib chiqadi. Vengriya (8) va Turkiya (6) esa o‘zaro o‘yinda muvaffaqiyat qozonish bilan birga Rossiyaning ochko yo‘qotishini kutadi.
B4 guruhi. Keyingi bosqich masalasi so‘nggi turdagi Uels (13) va Finlyandiya (12) o‘yinida hal bo‘ladi.
C4 guruhi. Belarus (10) va Albaniya (8) so‘nggi turda birinchi o‘rin masalasini hal qilsa, Qozog‘iston (4) va Litva (5) jamoalari o‘rtasidagi o‘yindan keyin eng quyi ligaga ravona bo‘ladigan jamoa nomi ma’lum bo‘ladi.
Barcha guruhlardagi holat bilan UEFA rasmiy saytida tanishish mumkin — havola.
Ma’lumot uchun, Millatlar Ligasi reglamentiga ko‘ra, eng yuqori liga (A Ligasi) guruhlarida birinchi o‘rinni qo‘lga kiritgan jamoalar musobaqa yarim finaliga yo‘l oladi. Qolgan guruhlardagi birinchi o‘rin egalari esa o‘zidan bitta yuqori ligaga ko‘tariladi va musobaqaning keyingi mavsumida o‘sha yerda to‘p suradi. Guruhlarda so‘nggi o‘rinni egallagan jamoalar esa bitta quyi ligaga tushib ketadi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)