Belgiya hukumati mamlakatdagi koronavirusga qarshi cheklovlarni mahalliy Santa-Klaus – Sinterklaas va Per-Noel uchun yumshatishga qaror qildi. Bu haqda Meduza xabar berdi.
Belgiya sog‘liqni saqlash vaziri Frank Vandenbruk Sinterklaasga xat yozib, u Belgiyaga yetib kelganidan keyin karantinni 10 kunga yumshatish zarurligini ma’lum qildi. Vazirning ta’kidlashicha, ehtimol, Sinterklaas Ispaniyadan qiladigan safar 17 kun davom etadi. Bu esa belgilangan karantin muddatidan uzoq.
Shuningdek, Vandenbruk Belgiyada komendantlik soati joriy etilganini, boshqa narsalar qatorida Sinterklaas bolalarga sovg‘a topshiradigan 2020-yil 6-dekabrga o‘tar kechasi ham ish olib borishini ta’kidlaydi. Ammo vazir ushbu cheklov Belgiya Santa-Klauslariga tatbiq etilmasligiga va’da berdi. Aks holda ular o‘z vazifalarini bajara olmaydi. “Siz bolalarning ko‘ngli qolishini xohlamaysiz. Biz ham buni istamaymiz”, − deyiladi maktubda.
“Siz skafandrda tomdan tomga o‘tishingiz shart emas. Ammo biz sizga doimo masofa saqlashni, qo‘llarni muntazam yuvib turishni va agar kerak bo‘lsa niqob kiyishni ham maslahat beramiz”, − deya qo‘shimcha qiladi vazir.
Vazir Sinterklaasga bu yilgi murojaatida Belgiyada bolalar alohida jasorat ko‘rsatganligini ta’kidladi. Pandemiya tufayli ularning hayoti o‘zgardi: ular endi do‘stlarini avvalgidek ko‘rolmaydi, sevimli mashg‘ulotiga borolmaydi, bobo va buvisinikiga tashrif buyura olmaydi. Shuning uchun ham har bir bola Sinterklaas tomonidan ilgarilari berilmagan sovg‘alarga loyiqligini alohida ta’kidlab o‘tgan.
Mavzuga doir:
Izoh (0)