COVID-19 koronavirus infeksiyasi va grippning simptomlari o‘xshash, ammo ta’m va hid bilishning yo‘qolishi, nafas qisishi va harorat kabi belgilar koronavirusning qo‘shimcha simptomlari bo‘lishi mumkin. Bu haqda Jahon sog‘liqni saqlash tashkiloti bayonotiga tayanib, “RBK” xabar berdi.
“COVID-19 va gripp yo‘tal, tumov, tomoq og‘rig‘i, isitma, holsizlik kabi o‘xshash simptomlarga ega. Ammo COVID-19 ta’m va hid bilish hissining yo‘qolishi, nafas qisishi kabi qo‘shimcha simptomlarni keltirib chiqarishi mumkin”, — deyiladi tashkilot bayonotida.
JSST qo‘shimcha qilishicha, koronavirusning og‘ir formasida bemorlarda nafas qisishi, ishtaha yo‘qolishi, ko‘krak sohasida muttasil og‘riq yoki bosim, 38 darajadan yuqori harorat, shuningdek, ong chalkashishi kuzatilishi mumkin.
Bunday simptomlar bilan bemor tezlikda tibbiy yordam so‘rab murojaat qilishi kerak. Shuningdek, surunkali kasalliklari bo‘lgan bemorlar, keksa fuqarolar hamda besh yoshgacha bo‘lgan bolalar va homilador ayollar ham shifokorga murojaat qilishi zarur.
So‘nggi ma’lumotlarga ko‘ra, pandemiya boshidan buyon dunyo bo‘yicha 52 milliondan ortiq odam koronavirusga chalingan. Eng ko‘p holatlar AQSh, Hindiston va Braziliyada qayd etilgan. Dunyo bo‘yicha jami 1,28 million kishi koronavirusdan vafot etgan. Eng ko‘p qurbonlar AQShda (240,9 ming), Braziliyada (163,3 ming) va Hindistonda (127,5 ming).
Izoh (0)