Tramp hokimiyatni qanday shart bilan Baydenga topshirishi ma’lum bo‘ldi

AQSh prezidenti Donald Tramp sudda ovoz berish bilan bog‘liq ishni ko‘rib chiqish kutilganidek natija bermasa, o‘zining saylovlardagi mag‘lubiyatini tan olishga rozi bo‘ldi. Bu haqda Fox News telekanali o‘z manbalariga tayanib xabar berdi, deb yozadi “RBK”.

Fox News yozishicha, “sudda ish ko‘rib chiqilganidan keyin uning g‘alaba qozonish imkoniyati yo‘qligi” oydinlashsa, Tramp yon bosishga tayyor bo‘ladi. The New York Times gazetasi Trampning yordamchilariga tayanib qayd etishicha, yaqin orada prezident raqibi Jo Baydenning g‘alabasini tan olmoqchi emas.

Ayni paytda NYT, CNN, Fox News va Associated Press prognozlari bo‘yicha, Bayden saylovchilar kollegiyasining g‘alaba uchun zarur bo‘lgan 270 dan ortiq ovozini qo‘lga kiritib bo‘lgan. Ammo Tramp g‘alaba qozonganini da’vo qilishda davom etib, saylovlarda “xunuk narsalar” sodir bo‘lganini, ovozlar sanab chiqilayotgan ba’zi binolarga esa kuzatuvchilar qo‘yilmaganini aytmoqda.

Trampning saylovoldi shtabi va Respublikachilar partiyasi Milliy qo‘mitasi Arizona shtatidagi Marikopa okrugi ustidan sudga shikoyat arizasi bergan. Tramp kampaniyasining bosh huquqiy maslahatchisi Mett Morgan ma’lum qilishicha, okrugda saylovchilar shaxsan kelib bergan ovozlar noto‘g‘ri hisoblangan.

Avvalroq Trampning shaxsiy advokati Rudi Juliani amaldagi prezident jamoasi Baydenning Pensilvaniya asosiy shtatidagi g‘alabasi ustidan ham sudga shikoyat qilmoqchi ekanligini aytgandi. “Bizni ushbu byulletenlarning haqiqiyligini tekshirish huquqidan mahrum qilishdi”, — dedi Juliani.

AQShda prezident saylovlari 3-noyabr kuni bo‘lib o‘tdi, ammo ularning yakuniy natijalari pochta orqali ovoz berilganligi va saylovga rekord darajada ko‘p (avvalgi yillardagidan 15 millionga ko‘p) saylovchilar kelganligi tufayli kechikdi. Dastlab ba’zi shtatlarda, shu jumladan, Viskonsin va Jorjiyada uzoq vaqt davomida Tramp yetakchilik qilib turdi, ammo ovozlarning so‘nggi qismini hisoblash chog‘ida ustunlik Bayden tomonga o‘tdi. Tramp uning yetakchiligi “sehrli tarzda” g‘oyib bo‘lganini aytib, buni “juda g‘alati” deb atadi.