“O‘zbekistonning bir nechta hududlarida quyosh, shamol va issiqlik elektr stansiyalari quriladi” – Energetika vaziri o‘rinbosari

Jizzax, Samarqand va Surxondaryoda quyosh, Buxoro va Qoraqalpog‘istonda shamol, Sirdaryo va Surxondaryoda issiqlik elektr stansiyalari barpo etiladi. Bu haqda 27-oktabr kuni Energetika vaziri o‘rinbosari Sherzod Xodjayev AOKAda bo‘lib o‘tgan brifing ma’lum qildi.

“Energetika sohasiga xususiy investitsiyalar kirib kelishi boshlandi. Bir yilning o‘zida davlat-xususiy sheriklik asosida 2 milliard dollarlik to‘g‘ridan to‘g‘ri sarmoyalarni jalb qilish, 2 ming 700 megavatt quvvatli 6 ta yangi elektr stansiyasini qurish bo‘yicha loyihalar ishlab chiqildi. Qolgan stansiyalarni modernizatsiya qilinadi, energiya tejamkorlikni oshirish, tannarxni pasaytirish va istiqbolda elektr energiyasining raqobatli bozori yaratiladi”, – dedi Sherzod Xodjayev.

Brifingda ma’lum qilinishicha, bugungi kunda elektr stansiyalarining eskirganlik darajasi 50 foizdan yuqori yoki eski quvvatlarda yoqilg‘i sarfi yangi bug‘-gaz qurilmalariga nisbatan 2 baravarga ortiq. Modernizatsiya ishlari endi davlat kafolati hisobiga emas, balki xususiy kapitalni jalb qilish orqali amalga oshiriladi.

Shuningdek, “O‘zbekiston milliy elektr tarmoqlari”, “Hududiy elektr tarmoqlari”, “Issiqlik elektr stansiyalari” hamda “O‘zbekgidroenergo” aksiyadorlik jamiyatlarida moliyaviy hisobotlarni jahon standartlari asosida tayyorlash tizimiga o‘tadi. Mazkur 4 kompaniyaning uch yillik moliyaviy modeli va biznes rejalari ishlab chiqiladi. Transformatsiya jarayonlariga ko‘maklashish uchun korxonalar boshqaruviga va kuzatuv kengashlariga chet ellik mutaxassislar jalb qilinadi.

Bundan tashqari elektr energiyasi ulgurji bozori qoidalari belgilanmagani sababli investorlar bilan energiyani qat’iy narxlarda xarid qilish bo‘yicha uzoq muddatli shartnomalar imzolanmoqda. Bunday yondashuv kelgusida raqobatning cheklanishiga olib kelishi mumkin. Shu bois elektr energiyasi raqobatli bozoriga o‘tish bosqichlari va qoidalarini belgilovchi hujjat ishlab chiqiladi va sohaga ilg‘or texnologiyalarni keng joriy etiladi, “raqamli transformatsiya” amalga oshiriladi.