Rossiya iste’molchilar huquqlarini himoya qilish va inson farovonligi sohasidagi kuzatuv bo‘yicha federal xizmati (“Rospotrebnadzor”) rahbari Anna Popova o‘zi imzolagan qaror bilan Rossiya fuqarolariga odamlar ommaviy to‘planadigan joylarda, transportda, avtomobil turargohlarida va liftlarda himoya niqoblarini taqish majburiyatini yukladi, deb yozadi Meduza.
Bundan tashqari, “Rospotrebnadzor” 23:00 dan 6:00 gacha ko‘ngilochar-tomosha tadbirlari o‘tkazilishini va umumiy ovqatlanish xizmatlarini ko‘rsatishni taqiqlashni tavsiya etdi.
Transportda, taksilarda, do‘konlarda, restoranlarda va teatrlarda dezinfeksiya rejimi kuchaytirilishi kerak. Hududlarga har 100 ming aholiga kamida 150 ta koronavirus testini o‘tkazish tavsiya qilindi.
Yangi cheklov choralari Rossiyada “o‘tkir respirator virusli infeksiyalar va gripp bilan kasallanish mavsumiy avj oladigan davrda” koronavirus tarqalishi xavflarini kamaytirish maqsadida joriy qilingan. Qaror 28-oktabrdan kuchga kiradi.
Eslatib o‘tamiz, Dunyoda koronavirus bilan kasallanganlar soni 43 million kishidan oshdi. Kasallikka chalinish holatlari bo‘yicha AQSh hamon yetakchilik qilmoqda — mamlakatda 8,63 million kishida COVID-19 tasdiqlangan. Hindiston 7,90 million ko‘rsatkich bilan ikkinchi, Braziliya esa 5,39 million ko‘rsatkich bilan uchinchi o‘rinda. Undan keyingi pog‘onalarni Rossiya (1,52 million) va Fransiya (1,18 million) egallagan.
Izoh (0)