Futbol bo‘yicha Coca-Cola Superliga 20-turida “Paxtakor” 24-oktabr, shanba kuni “Surxon” maydoniga safar qildi.
O‘yin kutilganidek mehmonlarning ustunligida boshlandi. “Sherlar” bo‘lim oxiriga borib ketma-ket uchta to‘p kiritishga erishdi. 41-daqiqada Eren Derdiyok hisobni ochgan bo‘lsa, oradan ikki daqiqa o‘tib Asror G‘ofurov o‘z darvozasini ishg‘ol qilib qo‘ydi. Birinchi bo‘limga qo‘shib berilgan vaqtda Akrom Komilov hisobni yirik ko‘rinishga olib keldi.
Ikkinchi bo‘lim debyutida Igor Sergeyev raqib jarima maydoni ichida to‘pni ajoyib usulda to‘xtatib oldi va darvozani aniq nishonga oldi. 60-daqiqada esa Jaloliddin Masharipov Sergeyevning zargarona uzatmasidan keyin jamoasining beshinchi golini urdi.
O‘yin yakunlanishi arafasida Javohir Sidiqov jarima zarbasini aniq ijro etgan holda yakuniy hisobni o‘rnatdi.
Ushbu g‘alabadan keyin Shota Arveladze jamoasining ochkolari 50 taga yetdi. Bitta zaxira o‘yiniga ega “Paxtakor” eng yaqin ta’’qibchisini 8 ochkoga ortda qoldirmoqda. “Surxon” (12) esa 13-pog‘onadan joy olgan.
Coca-Cola Superliga
20-tur bahsi
24-oktabr, shanba
“Surxon” — “Paxtakor” 0:6
Gollar: 0:1 – 41 Derdiyok 41, 0:2 – 43, avtogol G‘ofurov, 0:3 – 45+1 Komilov, 0:4 – 53 Sergeyev, 0:5 – 60 Masharipov, 0:6 – 79 Sidiqov.“Surxon”: Azamat Ahmedov, Abduqahhor Xojiakbarov, Nizomjon Norov (Sherzod Karimov, 46), Aleksandr Kasyan (Muhammad Ali Abdurahmonov, 62), Nuriddin Hasanov (Muhammadali Nomozov, 89), Husniddin G‘ofurov, A’zam Aliyev, Jahongir Mehmonov, Darko Stanoyevich, Behruz Shaydulov, Asror G‘ofurov (Sardor Sulaymonov, 58).
“Paxtakor”: Eldor Suyunov, Akrom Komilov, Anzur Ismoilov, Jaloliddin Masharipov, Dragan Cheran (Javohir Sidiqov, 72), Yegor Krimets, Doston Hamdamov (Hojimat Erkinov, 58), Odiljon Hamrobekov (Sardor Sobirxo‘jayev, 58), Abror Ismoilov, Farruh Sayfiyev (Hojiakbar Alijonov, 58), Eren Derdiyok (Igor Sergeyev, 46).
Ogohlantirishlar: Mehmonov (52), Hojiakbarov (68).
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)