Rossiyalik xakerlar AQShdagi ba’zi federal va mahalliy kompyuter tarmoqlariga kirish imkoniyatini qo‘lga kiritgan, bu Moskvaning prezident saylovlariga ta’sir o‘tkazishiga yo‘l ochishi mumkin. Bu haqda The New York Times Amerika razvedka xizmatlaridagi manbasiga tayanib xabar berdi, deb yozadi “RBK”.
“Rasmiy shaxslar Rossiya nima qilishni rejalashtirayotganini aytmadi, ammo ularning taxminicha, operatsiyaning maqsadi prezident Trampga yordam berish”, — deyiladi maqolada.
Ayni paytda Rossiya xakerlari ovozlarni hisoblash mexanizmlarini yoki saylovchilarni ro‘yxatga olish haqidagi ma’lumotlarni o‘zgartirgani haqida hech qanday dalillar yo‘q, degan gazeta hamsuhbatlari. Ammo, ularning so‘zlariga ko‘ra, xakerlar tarmoqlarga kirish imkoniyatidan foydalanib, ma’lumotlarni buzib ko‘rsatishi, yopiq ma’lumotlarni ommaga e’lon qilishi yoki “natijalar ishonchli ekanligi yuzasidan shubha uyg‘otish” uchun boshqa choralarni ko‘rishi mumkin.
Avvalroq 22-oktabr kuni AQSh Milliy razvedkasi rahbari Jon Retkliff Eron va undan alohida tarzda Rossiya saylovchilarni ro‘yxatga olish haqida “qandaydir ma’lumot”ni qo‘lga kiritganini muassasada tasdiqlashganini aytgandi. Uning so‘zlariga ko‘ra, ushbu ma’lumotlar yordamida saylovchilar o‘rtasida “chalkashlik va tartibsizlikni yuzaga keltirish” maqsadida yolg‘on axborot tarqatilishi mumkin.
Kremlda esa Retkliffning bayonotiga javoban, saylovlarga aralashish ayblovlari har kuni yog‘ilayotgani, ammo asossiz bo‘lib qolayotganini ma’lum qilishdi.
Shu yilning avgust oyida AQSh milliy kontrrazvedka markazi direktori Uilyam Evanina AQShdagi prezidentlik saylovlariga Rossiya, Eron va Xitoy aralashishga urinayotganini ma’lum qilgandi. Uning so‘zlariga ko‘ra, Rossiya Baydenning, Eron va Xitoy esa Trampning saylanishiga yo‘l qo‘ymaslikka urinyapti.
AQShda prezident saylovlari 3-noyabr kuni bo‘lib o‘tadi. Unda amaldagi prezident, Respublikachilar partiyasidan nomzod Donald Tramp va demokratlardan nomzod Jo Bayden raqobatlashadi.
Respublikachilar partiyasi 24-avgust kuni prezidentlik va vitse-prezidentlikka nomzod sifatida Donald Tramp va Maykl Pensni ko‘rsatgan. Demokratlar partiyasi esa AQSh prezidenti sifatida Jo Bayden, vitse-prezident sifatida Kaliforniya senatori Kamala Xarris nomzodini ilgari surgan.
Izoh (0)