Vazirlar Mahkamasi huzuridagi Ta’lim sifatini nazorat qilish davlat inspeksiyasi OTMlarning milliy reytingini e’lon qildi.
“Fevral—iyun oylarida respublikaning 57 ta oliy ta’lim muassasalari (filiallari bilan birga) faoliyati tahlil qilindi va 2020-yil 1-yanvar holatiga ko‘ra, ularning reyting natijalari tayyorlandi”, - deyiladi inspeksiya axborot xizmatining xabarida.
Reytingga ko‘ra, gumanitar va iqtisodiy sohada O‘zbekiston Milliy universiteti, Samarqand davlat universiteti, Toshkent moliya instituti, Toshkent davlat o‘zbek tili va adabiyoti universiteti yetakchi o‘rinlarni egallagan.
Nukus davlat pedagogika instituti, Qo‘qon davlat pedagogika instituti, Guliston davlat universiteti, Jizzax davlat pedagogika instituti kabilar esa reytingning so‘nggi o‘rinlariga joylashdi.
Shuningdek, qayd etilishicha ushbu sohada O‘zbekiston xalqaro islom akademiyasi, Toshkent davlat o‘zbek tili va adabiyoti universiteti, Jahon iqtisodiyoti va diplomatiya universiteti avvalgi yilga nisbatan yuqori pog‘onalarga ko‘tarilgan.
Texnika va qishloq xo‘jaligi sohasida Toshkent irrigatsiya va qishloq xo‘jaligini mexanizatsiyalash muhandislari instituti, Toshkent axborot texnologiyalari universiteti, Toshkent davlat agrar universiteti, Toshkent temiryo‘l transporti muhandislari instituti yetakchi o‘rinlarni egalladi.
Andijon mashinasozlik instituti, Buxoro muhandislik texnologiya instituti, Samarqand veterinariya tibbiyot instituti, Samarqand davlat arxitektura-qurilish instituti quyi o‘rinlardan joy oldi.
Toshkent davlat texnika universiteti, Toshkent arxitektura-qurilish instituti kabi OTMlar avvalgi yilga nisbatan yuqori pog‘onalarga ko‘tarilgan.
Tibbiyot sohasida Toshkent stomatologiya instituti, Toshkent tibbiyot akademiyasi, Buxoro davlat tibbiyot instituti yetakchi o‘rinlarni egalladi. Buxoro davlat tibbiyot instituti o‘tgan yilgi reytingdagi 16-o‘rindan yuqoriga ko‘tarilib, 12-o‘ringa chiqdi.
Toshkent farmatsevtika instituti, Andijon davlat tibbiyot instituti esa so‘nggi o‘rinlarni egalladi.
Madaniyat, san’at va sport sohasida O‘zbekiston davlat jismoniy tarbiya va sport universiteti, O‘zbekiston davlat san’at va madaniyat instituti yetakchi o‘rinlarga joylashdi. Mazkur OTMlar dastlabki reytinglarda eng oxirgi o‘ntalikka tushgan edi. Joriy reytingda ular mos ravishda 29 va 32-o‘rinlarga ko‘tarilgan.
O‘zbekiston davlat xoreografiya akademiyasi sohada so‘nggi o‘rinni egallagan.
Umumiy reytingda O‘zbekiston Milliy universiteti, Toshkent irrigatsiya va qishloq xo‘jaligini mexanizatsiyalash muhandislari instituti, Samarqand davlat universiteti, Toshkent axborot texnologiyalari universiteti, Toshkent davlat agrar universiteti yetakchi o‘rinlarni qayd etilgan.
Nukus davlat pedagogika instituti, Qo‘qon davlat pedagogika instituti, Guliston davlat universiteti, Jizzax davlat pedagogika instituti so‘nggi o‘rinlarda qolmoqda.
Izoh (0)