Toshkent viloyatining Nurafshon shahrida Niderlandiyadagi Lumidea Engineering qurilish kompaniyasi tomonidan ishlab chiqarish zavodi barpo qilinadi. Bu haqda Toshkent viloyati hududiy elektr tarmoqlari korxonasi OAV vakillari uchun uyushtirgan press-turda ma’lum qilindi, deya xabar bermoqda “Daryo” muxbiri.
Ta’kidlanishicha, loyiha qiymati 29 milliard 600 million so‘m bo‘lib, zavod 5 gektar yer maydonida bunyod etiladi. 2021-yilning mart oyida ishga tushirilishi rejalashtirilayotgan ishlab chiqarish obyektida 200 nafarga yaqin ishchi o‘rni yaratiladi.
“Viloyat bo‘yicha jami 534 ming dona tayanch ustunlar mavjud. Shundan 277 ming donadan ziyodi simyog‘ochlar bo‘lib, ularni beton ustunlarga almashtirish zarur. Respublikamizdagi bir qancha ishlab chiqarish zavodlaridan haftasiga 20-30 dona beton ustunlar xarid qilyapmiz. Ammo bu juda oz va biz bundan qanoatlanmayapmiz. Bu ketishda Toshkent viloyatidagi ehtiyojni qondirish uchun uzoq yillar kutishimizga to‘g‘ri keladi.
Xodimlar bilan maslahatlashib, viloyatda beton ustunlari va kabel mahsulotlari ishlab chiqarishni rejalashtirdik. Loyihamiz viloyat hokimiga ham ma’qul keldi.
Tahlil qilib ko‘rsak, bitta beton ustunni boshqa zavodlardan bir million 100 ming so‘mga xarid qilsak, yangi quriladigan korxonada bir dona beton ustun 580 ming so‘mga tayyor bo‘larkan. Kuniga 64 dona mahsulot ishlab chiqarish ko‘zda tutilgan. Bundan tashqari, boshqa viloyatlarga ham buyurtma asosida mahsulot yetkazib berish niyatimiz bor”, — dedi Toshkent viloyati hududiy elektr tarmoqlari korxonasi rahbari Nilufar Botirova.
Botirovaning qo‘shimcha qilishicha, yangi zavodda yiliga 20 ming dona jahon standartlariga javob beradigan elektr beton ustuni, Yevropa tajribasi asosida 5 ming kilometr kabel mahsulotlari hamda 150 ming dona izolyator va 12 ming dona travers ishlab chiqariladi.
Izoh (0)