Moskvaning “Lokomotiv” klubi yarim himoyachisi Jasur Jaloliddinov ijara asosida “Tambov”ga o‘tdi. Bu haqda “temiryo‘lchilar” rasmiy saytida xabar berildi.
Qayd etilishicha, Jasur mavsum so‘ngigacha “Tambov” sharafini himoya qiladi.
“Tambov” RPL 10-turidan keyin 8 ochko to‘plagan holda 13-o‘rinda ketmoqda.
Avvalroq “Lokomotiv” legionerlarga qo‘yilgan limit tufayli Jasurni Rossiya chempionati qaydnomasidan o‘chirgandi. Shuningdek, moskvaliklar Chempionlar Ligasi qaydnomasiga ham o‘zbekistonlik futbolchini kiritmadi.
Jasur Jaloliddinov — 2002-yil 15-mayda Navoiyda tug‘ilgan. 2018-yil 2-avgust sanasida “Bunyodkor” safida Superliga doirasida debyut o‘yinini “Qo‘qon-1912”ga qarshi o‘tkazgan. U debyut qilgan vaqtda 16 yosh 80 kunlik edi. Bu orqali u O‘zbekiston chempionatida maydonga tushgan eng yosh futbolchiga aylangandi. 2019-yil oktabrida The Guardian talqiniga ko‘ra, dunyoning eng iste’dodli 60 futbolchisi ro‘yxatida qayd etilgan. 2019-yil yakunlariga ko‘ra, Superliganing eng yaxshi o‘yinchisi deb topilgan. 2019-yil dekabrida Italiyaning “Benevento” klubi ko‘rigida bo‘lgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)