Oliy Majlis Senat raisi Tanzila Norboyeva hokimlar, albatta, saylanishi kerakligi, biroq bu jarayon bosqichma-bosqich bir necha yil davomida amalga oshirilishini aytib o‘tdi. U bu haqda 6-oktabr kuni Toshkent viloyati hokimligida bo‘lib o‘tgan Senat kengashining sayyor majlisidan so‘ng tashkil etilgan matbuot anjumanida ma’lum qilgan, deya xabar bermoqda “Kun.uz”.
“Hokimlar saylovi masalasida davlatimiz rahbari bir necha bor aytgandi. Menimcha ikki yil oldin Parlamentga murojaatida ham bu haqda gapirgandi. Hokimlar saylovi bo‘lishi kerak. Albatta, bu demokratik davlatlarning hammasida mana shunday jarayon, saylov orqali mahalliy ijro organlari saylanadi. Bizda ham shu jarayonga qadamlar qo‘yilyapti. Kuni kecha ham videoselektorda davlatimiz rahbari buni yana bir bor ta’kidlab o‘tdi. Lekin qachon bo‘ladi, degan savolingizga men hozir aniq javob berolmayman.
Bizda hammasi bosqichma-bosqich bo‘lyapti. Biz hali hokimlar sayloviga o‘zimiz tayyor emasmiz. Tasavvur qiling, mana kuni kecha Rossiyaning qaysidir provinsiyasida obodonlashtirish sohasida ishlaydigan bir ayolni gubernator qilib saylab qo‘yishdi. Nima bo‘lsa ham aholining o‘sha yerdagi gubernatordan bezganidan bo‘lgan-da, bu narsa. Kim bo‘lsa ham o‘sha bo‘lmasin degan dunyoqarash bo‘lgan mahalliy aholida. Menimcha bu jarayonga odamlar ham tayyor bo‘lishi kerak”, – deydi Senat raisi.
Norboyeva hokimlarning senator bo‘lishi borasida jamoatchilikda e’tirozlar ko‘p ekani xususida ham to‘xtalib, mahalliy ijro organlari bilan vakillik organlarini ham ajralishi kerakligini ta’kidlagan. Uning aytishicha, deputatlar ijro organida ishlamasligi, ijro organida ishlaydiganlar senator bo‘lmasligi kerak.
“Aholimizni ham huquqiy madaniyati ortib, budjet nima ekanligini, qonun qanaqa ishlash kerakligini bilyapti. Barcha sohada aholini siyosiy madaniyati, siyosiy bilimi juda ham oshib boryapti. Jarayonga odamlarni ongi tayyor bo‘lib, shu ishni bajaradigan odamlar ham, rahbarlar ham tayyor bo‘lishi kerak-da. Nimagaki, u jarayonlarni amalga oshirishda ertaga har xil kulgili vaziyatlarga tushib qolmasligimiz kerak.
Shuning uchun men o‘ylaymanki, bu jarayon juda ham uzoqqa cho‘zilmaydi. Yaqin yillar deganimda 5 yoki 10 yil emas, balki undan ham oldinroq mana shu hokimlar sayloviga, albatta, o‘tamiz.
Shu bilan birga parallel ravishda o‘sha mahalliy ijro organlari bilan vakillik organlarini ham ajralishi nazarda tutilgan. Ya’ni, deputatlar bu ijro organida ishlashi kerakmas, ijro organida ishlaydiganlar senator bo‘lishi kerakmas. Aytganimizday hokimlarimizni ham senator bo‘lishida e’tirozlar ko‘p. To‘g‘rimi, o‘ziga o‘zi topshiriq beradi, deyilyapti. Lekin bu narsalar vaqtincha va, albatta, biz mana shunday demokratik davlatlarni darajasiga yetib, hamma o‘zini ishini qiladigan jarayonga yetishamiz”, – deya ta’kidlagan Tanzila Norboyeva.
Avvalroq Shavkat Mirziyoyev 24-sentabr kuni o‘tkazilgan selektorda hokimlarni xalq saylashi kerakligi ta’kidlab o‘tgan edi.
Izoh (0)