Chet elliklarga Ukrainaga erkin kirishga ruxsat berildi, deb xabar bermoqda “RIA Novosti”. Qayd etilishicha, chet elliklarning mamlakat hududiga kirishiga cheklov 28-sentabrdan boshlab olib tashlandi.
“Interfaks”ning yozishicha, davlat chegara xizmati vakili Andrey Demchenko ayni paytda chet elliklarning Ukrainaga kirishida o‘zini izolyatsiya qilish yoki sug‘urta polisi bilan bog‘liq alohida talablar yo‘qligini aytgan.
Pandemiya tufayli Ukraina chegaralarini chet elliklar uchun 28-avgustdan 28-sentabrgacha yopishni mamlakat vazirlar mahkamasi qaror qilgandi. Mamlakat prezidenti Vladimir Zelenskiy buni to‘g‘ri qaror deb hisoblab, Ukraina o‘z fuqarolarini ham, mamlakatga keladigan boshqa davlat fuqarolarini ham xavf ostiga qo‘ya olmasligini ta’kidlagan. Keyinchalik vaziyat barqarorlashgach, Ukraina chegaralari, albatta, ochilishini bildirgan.
Mamlakatda umumiy karantin 12-martdan joriy qilindi. 11-maydan boshlab ayrim choralar yumshatilgan va mahalliy hukumatga vaziyatga qarab karantinni kuchaytirish yoki kamaytirish huquqi berilgan. Ya’ni butun mamlakat bo‘ylab emas, faqat tegishli hududlardagina cheklovlar kuchaytirilgan. Keyinchalik karantinni noyabr oyigacha uzaytirishga, shuningdek, ayrim toifalardan tashqari chet elliklarning 28-sentabrga qadar mamlakat hududiga kirishni taqiqlashga qaror qilingan.
Bugungi kunda Ukrainada 201 305 kishida COVID-19 tasdiqlangan, infeksiyadan 3996 kishi vafot etgan, 88 453 nafari sog‘aygan.
Izoh (0)