“Paxtakor” yordamchi murabbiyi Piter Hyuistra: “Persepolis” — juda kuchli raqib, ammo ularni mag‘lub eta olamiz

Futbol bo‘yicha Osiyo Chempionlar Ligasining chorak finali doirasida kechadigan “Paxtakor” — “Persepolis” uchrashuvi oldidan matbuot anjumani o‘tkazildi.

Unda toshkentliklar klubi yordamchi murabbiyi Piter Hyuistra va himoyachi Yegor Krimets o‘z fikrlari bilan o‘rtoqlashdi.

Bizni juda ham keskin o‘yin kutmoqda deyish mumkin. Biz eng yaxshi 4 klub orasidamiz, “Persepolis” — juda kuchli raqib. Shunga qaramasdan o‘yinga yaxshi tayyorgarlik ko‘rdik va g‘alaba qozonishimizga ishonamiz, maqsadimiz ham shu.

Yopiq o‘yin kutish mumkinmi? Shunday bo‘lishi ham mumkin. Hammasi o‘yinning qanday boshlanishidan kelib chiqadi, uchrashuvning ahamiyati yuqori. Startda futbolchilar o‘zlarini qanday tutishiga ko‘p narsa bog‘liq. Qanday himoyalanish yoki vaziyatlarni ko‘ra olish kabi kichik detallar ham natijaga ta’sir qilishi mumkin. Hammasini o‘yinda ko‘ramiz. Unda sen barchasini to‘g‘ri qilishing kerak, to‘pga tayyor bo‘lishing va yutishga urinishing kerak. Shu sabab futbolchilarning maydonda ochiq joylarni ko‘ra olishi, qarorlarni to‘g‘ri qabul qila olishi ko‘p narsani hal qiladi. Bu bahsni yutishga urinish kerak, boshqa yo‘l ham yo‘q. Bu chorak final va unda har bir klub yo‘lini davom ettirishni istaydi.

Raqibning ikki yil avval finalda o‘ynagani ularga ustunlik beradi deb o‘ylamayman. Bu muhim bellashuv, bizning jamoa tarkibida terma jamoada o‘ynagan 11-12 nafar o‘yinchi bor, ular Jahon Chempionatlari saralashlarida va umuman katta bosimdagi o‘yinlarda ishtirok etgan. Bu borada tajribaga egalar. Futbolchilarimiz ulardan nima talab qilayotganimizni yaxshi tushunadi va o‘yin davomida vaziyatni o‘zgartirish uchun qanday harakatlanishni biladi. Shu sabab “Persepolis”da ustunlik bor deb o‘ylamayman. O‘yinda VAR tizimidan foydalaniladi, bu ham qiziqarli tajriba bo‘ladi deb o‘ylayman. Futbolchilar uchun ham, hakamlar uchun ham bu esda qolarli bo‘ladi.

Bu kabi musobaqalarda har 3 kunda o‘yin o‘tkazganda futbolchilarda charchoq bo‘lishi tabiiy. Kimdir qo‘shimcha bo‘limlarda ishtirok etadi, kimdir qiyin o‘yinlarni o‘tkazadi. Bunday bo‘lishi tabiiy hol, futbolchilarni organizmida ham o‘zgarishlar yuzaga keladi charchoq sabab. Muhimi esa bundan chiqib keta olish zarur. Bu holatlarda o‘yinchilar qo‘shimcha imkoniyatlarini ham ishga solishlari kerak bo‘ladi. Biz ham jiddiy muammolarga duch keldik. Pandemik vaziyat sabab uchta bosqichdan iborat jismoniy tayyorgarlik ustida ishlashimizga to‘g‘ri keldi. Ularni tetikroq qilishga urindik va ular hozir yaxshi holatda deb aytishim mumkin. Uchrashuvda bu borada yanada yaxshiroq bo‘lishga intilamiz.

Piter Hyuistra, “Paxtakor” yordamchi murabbiyi

Biz uchun juda muhim uchrashuv bo‘ladi. “Paxtakor” Chempionlar Ligasida anchadan beri bu bosqichga yetib kelmagandi. Bizda yaxshi jamoa bor, g‘alaba uchun borimizni beramiz. Hozir finalgacha yetib borish va musobaqada g‘olib bo‘lish uchun yaxshi imkoniyat yuzaga keldi va biz undan foydalanmoqchimiz. Bu ishni keyingi mavsumga qoldirib, yana bir yil kutmoqchi emasmiz.

Jarimadan gollarni o‘tkazib yuborish yoqimsiz, albatta. Murabbiylar shtabi bu borada ma’lum ishlarni amalga oshirdi. Ular bizga shunday vaziyatlardagi xatolarimizni ko‘rsatib berdi. Umid qilamanki, keyingi o‘yinlarda hammasi joyida bo‘ladi.

Biz Anzur bilan ancha yillardan beri terma jamoada ham o‘ynaganmiz. Darhaqiqat, bir-birimizni yaxshi tushunamiz, o‘zaro bog‘liqligimiz a’lo darajada. Kerak paytda yarimta gap bilan o‘rnimizni to‘ldira olamiz.Bu oldindagi katta o‘yinlarda muhim. To‘rtta eng yaxshi klub qolganda nafaqat himoyadagilarning, balki hujumdagilarning ham bir-birini yaxshi tushunishi muhim sanaladi.

Yegor Krimets, “Paxtakor” himoyachisi