Rossiyada COVID-19 bilan kasallanish surati bir muncha vaqt o‘sishda davom etadi, ammo vaziyat tez orada o‘zgaradi. “RBK”ning xabar berishicha, bu haqda Rossiya Fanlar akademiyasi akademigi Viktor Maleyev ma’lum qildi.
“O‘ylashimcha, hozir kasallanish darajasi yana biroz oshadi va biz ‘plato’ga yaqinlashamiz, keyin esa asta-sekin pasaya boshlaydi, eng yuqori cho‘qqiga chiqish holati bo‘lmasa kerak. ‘Plato’ katta ehtimol bilan oktabr boshlarida bo‘ladi, keyin esa asta pasayish boshlanadi”, — degan “Rospotrebnadzor” Markaziy ilmiy tadqiqotlar instituti direktorining maslahatchisi Maleyev.
Xabarda aytilishicha, “plato” bosqichiga chiqish haqida COVID-19’ga chalinganlarning bahorgi o‘sishi paytida kunlik kasallanishlar soni hozirgi ko‘rsatkichlardan ortiq bo‘lmasidan avval ham gapira boshlangan. Xususan, 7-aprelda Rossiyada aniqlangan kasallanganlar soni 1,1 ming kishi atrofiga yetganda Rossiya federal tibbiy-biologik agentligi rahbari Veronika Skvortsova “plato” bosqichiga chiqishga 10-14 kun qolganligini aytgan. 30-aprel kuni (kasallanganlar soni 5841 nafar bo‘lganda) Rossiya prezidenti matbuot kotibi Dmitriy Peskov mamlakat “plato”ga deyarli chiqayotganini ma’lum qilgan.
Biroq 6-may kuni (10 559 nafar) Sog‘liqni saqlash vaziri Mixail Murashko “plato”ga chiqishga hali ertaligi haqida ogohlantirgan. Mamlakatda butun pandemiya davrida aniqlangan COVID-19’ga chalinish bo‘yicha eng yuqori ko‘rsatkich (11 656) 11-may kuni e’lon qilingan. 26-may kuni prezident Vladimir Putin epidemiyaning eng yuqori cho‘qqisi ortda qolganini aytgan.
Maleyevning so‘zlariga ko‘ra, kuzda 2020-yil bahoridagi kabi eng yuqori ko‘rsatkichlariga yetmaydi, chunki “odamlar allaqachon immunitetga ega: kimdir kasallanib bo‘lgan, kimdir emlangan”.
28-sentabr kuni koronavirus infeksiyasiga qarshi kurash bo‘yicha tezkor shtab Rossiyada so‘nggi sutkada 8135 kishida koronavirus aniqlangani haqida xabar bergan. So‘nggi marta 8 ming kishidan ortiq kasallanish 16-iyunda qayd etilgan. Shu kuni 8248 kishida COVID-19 aniqlangan. Tezkor shtab ma’lumotlariga ko‘ra, mamlakatda butun pandemiya davomida 1 159 573 kishi koronavirusga chalingan. Ayni paytda mamlakat koronavirusga chalinganlar soni bo‘yicha dunyoda to‘rtinchi o‘rinda.
Izoh (0)