Andijondagi Muruvvat uyida 6,5 yoshli siam egizaklari tarbiyalanmoqda. Ularni jiddiy operatsiya kutmoqda (video)

Andijon viloyati Qo‘rg‘ontepa tumanidagi Muruvvat uyida olti yarim yoshli siam egizaklari tarbiyalanmoqda. YouTube’dagi UzGlobal TV kanali, shuningdek, “Zo‘r-TV” telekanali bir tanada yashaydigan Fotima va Zuhra haqida reportaj tayyorladi.

Ma’lum bo‘lishicha, Fotima va Zuhra alohida emas, balki siam egizaklarini bilgan onasi ulardan tug‘ruqxonadayoq voz kechgan. Qizaloqlar to‘rt yoshgacha Toshkentdagi maxsus muruvvat uyida tarbiyalangan. Qo‘rg‘ontepaga ko‘chirilganiga esa ikki yildan oshgan.

Egizaklar raqsga tushish va rasm chizishni yaxshi ko‘radi — Fotima o‘ng qo‘li bilan chizgan rasmni Zuhra chap qo‘lida bo‘yaydi. “Qizaloqlar ko‘proq uy va oilani tasvirlaydi. Bu bejizga emas, chunki ota-onasini juda ham ko‘rgisi keladi”, — deyiladi lavhada.

“Aya, uyga olib keting, deyman. Aytgandingiz-ku, deyman. Menga va’da berib qo‘ygandi ayam. Ketgim kelyapti uyimga”, — deydi Zuhra va tug‘ilgan kunida onasi kelishiga ishonadi. Boshlovchining: “Onangizni sog‘inasizmi?”, degan savoliga egizaklar: “Ha”, deydi, “Dadangizni-chi?”, degan savolga esa Zuhra: “Dadam yo‘q”, deb javob beradi.

“Bu qizlar muassasaga olib kelinganida juda kichkina edi. Hozir ancha katta bo‘lib qolishdi. Bir-biriga mehribon, sira urushmaydi. Ko‘proq yozish, qog‘oz bo‘yashni yaxshi ko‘rishadi. Makaronni juda yaxshi ko‘rishadi, osh va kashani ham sevib iste’mol qilishadi. Shirinliklardan ayniqsa novvotni yoqtirishadi”, — deydi muassasa tarbiyachilaridan biri.

Egizaklardan biri betob bo‘lib qolsa, bu ikkinchisiga ham ta’sir qiladi, lekin kamdan kam kasal bo‘lishadi; hozir ahvollari yaxshi, sog‘lom ulg‘ayishmoqda. Ta’kidlanishicha, ushbu siam egizaklarini jiddiy jarrohlik amaliyoti kutmoqda — ular bir-biridan ajratilsa ham yashab ketishi ehtimoli bor, deb hisoblanmoqda.

Ularni operatsiya qilsak bo‘ladi, deyapti. Ularning hamma organlari — qo‘li, oyog‘i, yuragi, oshqozoni ikkitadan, ammo jinsiy a’zosi bitta. Ular kelajakda yashab ketishi mumkin, deyilyapti.

Fotima bilan gaplashsangiz, u liderlik qilaman, deydi, Zuhra bilan gaplashsangiz, u ham liderlik qilaman deydi. Nega desangiz, ularning hayotga qiziqishi ham, intilishi ham kuchli.

Kelajagini ham gapirib beradi — kim bo‘lishini aytadi, kim bo‘lasiz deb so‘rasangiz, doktor, tibbiyot xodimi bo‘laman deydi.

Xurshidaxon Xalilova, Qo‘rg‘ontepadagi Muruvvat uyi direktori

Boshlovchining: “Kim birinchi uyg‘onadi, Fotimami, Zuhrami?”, degan savoliga egizaklar: “Bir vaqtda uyg‘onamiz”, deb javob beradi. “To‘polonchi emasmisizlar?”, degan savolga: “Yo‘q, to‘polonchi emasmiz”, deydi qizlar. Lavhada ta’kidlanishicha, ular uxlayotganida har 20 daqiqada — biri toliqsa, ikkinchisi bilan o‘rin almashadi.