O‘zbekiston Prezidenti farmoniga binoan, 2021-yil 1-yanvardan boshlab shaxsni raqamli identifikatsiya qilishning yagona tizimi joriy qilinmoqda. Bu haqda O‘zA xabar berdi.
Unga ko‘ra, biometrik pasportlar o‘rniga O‘zbekiston fuqarosining shaxsini va fuqaroligini tasdiqlaydigan elektron tashuvchi qurilmaga ega hujjat sifatida ID-karta joriy etilmoqda.
Biometrik pasportlar hamda yashash guvohnomalari ID-kartalarga quyidagi muddatlarda almashtiriladi:
- Birinchi bosqich — 2021-yil 1-yanvardan 2022-yil 31-dekabrgacha ixtiyoriylik asosida (16 yoshga to‘lganda yoki qonunchilikda ko‘rsatilgan boshqa sabablarga ko‘ra);
- Ikkinchi bosqich — 2023-yil 1-yanvardan 2029-yil 31-dekabrgacha majburiy tartibda.
ID-kartalarni olish va almashtirish uchun O‘zbekiston fuqarosi xohlagan ichki ishlar organlarining migratsiya va fuqarolikni rasmiylashtirish bo‘linmalariga murojaat qilishi mumkin.
Hozirgi biometrik pasportlarni rasmiylashtirish muddati 10 ish kuni bo‘lgan bo‘lsa, ID-kartalarni rasmiylashtirish 1 ish kunida amalga oshiriladi.
ID-karta quyidagi muddatlarga beriladi:
- Yangi tug‘ilgan bolaga bir yoshgacha — 2 yil muddatga;
- Bir yoshdan 16 yoshgacha — 5 yil muddatga;
- 16 yoshdan boshlab — 10 yil muddatga.
Eslatib o‘tamiz, O‘zbekiston hukumati 2020-yil 6-mart kuni “O‘zbekiston Respublikasida identifikatsiya ID-kartalarini rasmiylashtirish va berish tizimini joriy etish chora-tadbirlari to‘g‘risida”gi qarorni qabul qilgandi.
Izoh (0)