AQSh rahbari Donald Tramp Sindzo Abe bilan suhbatda uning ishini yuqori baholadi va Yaponiya tarixidagi eng buyuk bosh vazir deb atadi. Bu haqda Oq uy matbuot kotibi o‘rinbosari Jadd Dir Twitter’dagi sahifasida yozib qoldirdi.
“Prezident bosh vazir Abe juda katta ishlarni amalga oshirganini va ayni paytda AQSh va Yaponiya munosabatlari har qachongidan ham yaxshi ekanligini aytdi”, — deb qayd etgan u.
Uning bildirishicha, ikkala siyosatchi ham o‘zlarining “ajoyib do‘stliklari” kelajakda ham davom etishiga umid qilishlarini aytdi.
Sankei Shimbun nashrining yozishicha, Tramp va Abe telefon orqali gaplashgan. Abe, shuningdek, Yaponiya—Amerika munosabatlari mustahkamlangani uchun AQSh prezidentiga minnatdorchilik bildirgan.
Avvalroq 65 yoshli Abe sog‘lig‘i yomonlashgani sabab iste’foga chiqishini ma’lum qilgandi. Kyodo News’ning xabar berishicha, parlament mamlakatning yangi bosh vazirini 17-sentabrda saylaydi.
Izoh (0)