Chak Norris Lukashenkoni yig‘latishga va’da berdi (video)

Mashhur aktyor Chak Norris Belarus prezidenti Aleksandr Lukashenkoga murojaat qilib, uni yig‘latishga va’da berdi, deb xabar bermoqda “RIA Novosti”.

“Men Sashaga bir necha so‘z aytmoqchiman. Uni “Sasha nol foizi” va “Janob suvarak” deb ham atashadi. Bilasan, men piyoz to‘g‘rayotganimda men emas piyoz yig‘laydi. Shunday ekan, hozir qilayotgan ishingni to‘xtatmasang, men qarorgohlaringdan biriga boramanda, seni yig‘lashga majbur qilaman”, – dedi aktyor.

Video Cameo xizmati orqali yozilgan bo‘lib, u taniqli shaxslardan turli xil videolarni pul evaziga buyurtma qilish imkonini beradi.

Belarusdagi prezidentlik saylovi

Belarusda 9-avgust kuni prezident saylovi bo‘lib o‘tdi. Saylov kuni Minsk markazida harbiy texnika paydo bo‘ldi. Belarus militsiyasi saylov uchastkalari oldida to‘plangan odamlarni qo‘lga oldi. Saylov kuni oqshomida mamlakatning barcha yetakchi ommaviy axborot vositalarining saytlari ochilmay qoldi. Poytaxt Minskda prezident saylovidan keyin norozilik namoyishi boshlandi.

Belarus Markaziy saylov komissiyasining dastlabki hisob-kitoblariga ko‘ra, prezidentlik saylovlarida respublikaning amaldagi rahbari Aleksandr Lukashenko 80,23 foiz ovoz to‘plagan. Muxolifat nomzodi Svetlana Tixanovskaya esa rasmiy ma’lumotlarga ko‘ra, 9,9 foiz ovoz olgan.

Natijalar e’lon qilingach, Svetlana Tixanovskaya o‘tkazilgan saylovlarda o‘zini g‘olib deya hisoblashini ma’lum qildi va Lukashenkoga muzokaralar o‘tkazish taklifini berdi. Shuningdek, u saylovlarning natijasi yuzasidan Markaziy saylov komissiyasiga norozilik bildirdi.

Svetlana Tixanovskayaning shtabi 10-avgust kuni kechasi u Belarus Markaziy saylov komissiyasiga borganidan so‘ng yo‘qolib qolganini bildirgan. Kechga yaqin Tixanovskaya aloqaga chiqqan, biroq qayerda ekanligini oshkor etmagan. Belarus Davlat xavfsizlik qo‘mitasi Svetlana Tixanovskayaga uyushtirilgan suiqasdning oldi olinganini ma’lum qilgan.

11-avgust kuni Tixanovskaya Belarusdan chiqib ketgani va Litvada ekanligi ma’lum bo‘ldi. Uning shtabi tomonidan ma’lum qilinishicha, prezidentlikka nomzod bu ishni o‘z xohishi bilan qilmagan, balki shtab rahbari Mariya Morozning ozod etilishi evaziga hukumat bosimi ostida amalga oshirgan.

Shuningdek, 11-avgust kuni Tixanovskayaning videomurojaati e’lon qilingan. Unda Tixanovskaya o‘zining ketishi “og‘ir qaror” bo‘lganini ma’lum qilgan. “Men duch kelgan bunday tanlovda qolishni Xudo ko‘rsatmasin”, — degan Tixanovskaya.

Keyinroq Belarus hukumati tarafdori bo‘lgan Telegram kanal Tixanovskayaning boshqa bir videomurojaatini e’lon qildi. Nomzod mazkur murojaatda kameraga qaramasdan, varaqdan o‘z tarafdorlariga qaratilgan va namoyishlarni to‘xtatish haqidagi chaqiruvni o‘qib bergan.

Hozirda Litva hukumati tomonidan Svetlana Tixanovskayaga boshpana va qo‘riqchilar taqdim etilgan.

Aleksandr Lukashenkodan tashqari, prezidentlikka nomzodlarning barchasi saylov natijalaridan noroziligini bildirib, mamlakat Markaziy saylov komissiyasiga shikoyat kiritgan.

Belarusda 9-avgustdan buyon norozilik namoyishlari va namoyishchilarni qo‘llab-quvvatlash uchun chiqishlar davom etmoqda.

Lukashenko Rossiya prezidenti Vladimir Putin bilan Belarusdagi vaziyatni muhokama qildi. Rahbarlar barcha muammolar tez orada hal qilinishiga ishonch bildirdi, shuningdek, ittifoqchilik munosabatlarini mustahkamlashga qaror qilishganini ma’lum qildi.

Shuningdek, iyul oyi oxirida Belarusda hibsga olingan “Vagner” xususiy harbiy kompaniyasining 32 nafar a’zosi Rossiyaga qaytarilgani xabar qilingan.