O‘zbekiston jahon bozorida oltin narxining oshishidan foyda ko‘rdi

2020-yilning dastlabki olti oyida resurs soliqlari va mol-mulk solig‘i bo‘yicha tushumlarning umumiy hajmi 2019-yilning shu davriga nisbatan 0,5 trillion so‘mga oshib, 9,7 trillion so‘mni tashkil etdi. Bu haqda Moliya vazirligi xabar berdi.

Resurs soliqlaridan qo‘shimcha tushumlarning asosiy qismi yer qa’ridan foydalanganlik uchun soliqqa to‘g‘ri kelgan. 2020-yilning I yarim yilligida yer qa’ridan foydalanganlik uchun soliq tushumlari 2019-yilning I yarim yillikdagi tushumlar bilan solishtirganda 0,8 trillion so‘mga ko‘paygan va quyidagilar hisobiga 7,6 trillion so‘mni tashkil etgan:

• qimmatbaho metallar bozorida oltinning narxi 2019-yilning I yarim yilligiga nisbatan o‘rtacha 26 foizga o‘sishi. Tog‘-kon korxonalaridan ushbu soliq bo‘yicha qo‘shimcha tushumlar 5,5 trillion so‘mni tashkil qildi;
• qat’iy miqdorlarda belgilangan soliq stavkalarini 15 foizga indeksatsiya qilinishi va foydali qazilmalarning ayrim turlari uchun, qat’iy belgilangan miqdorlardan kam bo‘lmagan miqdorda to‘lanishini ko‘zda tutuvchi stavkalardan kelib chiqib to‘lanishini joriy qilinishi. Qo‘shimcha daromadlar qariyb 0,08 trillion so‘mni tashkil qilgan.

2020-yil dastlabki olti oyida O‘zbekiston Davlat budjeti daromadlari 58,2 trillion so‘mni tashkil etgan yoki o‘tgan yil mos davriga nisbatan 7,5 trillion so‘mga ko‘p mablag‘lar undirilgan.Avvalroq oltin zaxirasi O‘zbekistonga pandemiya vaqtida “jon saqlash”ga imkon berayotgani to‘g‘risida xabar berilgandi. May oyining boshida O‘zbekiston Markaziy banki 2020-yil uchun yangilangan prognozini e’lon qilgandi. Unda ko‘plab pessimistik prognozlar bilan bir qatorda, oltin borasida ijobiy taxminlar keltirilgan edi. Iyul oxirlarida O‘zbekiston oltin-valyuta zaxiralari hajmi ilk bor 32 milliard dollardan oshgan.