Tojikistonda prezidentlik saylovlarini o‘tkazish sanasi ma’lum qilindi

Tojikistonda navbatdagi prezidentlik saylovlari 11-oktabrda o‘tkazilishi belgilandi, deb xabar bermoqda Asia-Plus.

6-avgust kuni Tojikiston parlamenti palatalarining qo‘shma majlisida navbatdagi prezidentlik saylovlari qachon o‘tkazilishi bo‘yicha qaror qabul qilingan. Parlament qaroriga ko‘ra Tojikiston prezidentligiga saylov 2020-yil 11-oktabr kuni o‘tkazilishi belgilangan. Sessiyani yuqori palata raisi — Emomali Rahmonning to‘ng‘ich o‘g‘li Rustam Emomali olib borgan.

Avvalgi prezidentlik saylovi 2013-yilning 6-noyabrida o‘tkazilgan. Bu safar siyosiy partiyalar, kasaba uyushmalari, So‘g‘d, Xatlon va tog‘li Badaxshon viloyati hamda Dushanbe shahri o‘z nomzodini ilgari surishi mumkin.

Ma’lumot uchun, Tojikistonning amaldagi prezidenti Imomali Rahmon mamlakatni 1994-yildan beri uzluksiz boshqarib kelmoqda. Uning to‘ng‘ich o‘g‘li Rustam Emomali 17-aprel kuni Majlisi milliy (Tojikiston parlamenti yuqori palatasi) spikeri etib saylangandi. Ayni paytda u 32 yoshda. 2016-yilda mamlakat konstitutsiyasiga o‘zgartirish kiritilgan bo‘lib, prezidentlikka nomzodning yoshi 35 yoshdan 30 yoshgacha qisqartirilgan. Bu unga navbatdagi prezident saylovlarida ishtirok etish imkonini beradi.