Sardoba suv omborining o‘pirilishi natijasida yuz bergan suv toshqinidan zarar ko‘rgan Oqoltin tumanidagi 128 ta xonadonga bir boshdan qoramol tarqatildi. Bu haqda Toshkent viloyati hokimligi axborot xizmatiga tayanib, “Kun.uz” xabar berdi.
Ta’kidlanishicha, Qurbon hayiti munosabati bilan Toshkent viloyat hokimining tashabbusiga ko‘ra suv toshqinidan katta zarar ko‘rgan, mutasaddi idoralar tomonidan moddiy ko‘makka muhtoj deb topilgan 128 ta xonadonga bir boshdan qoramol topshirilishi belgilandi.
Hozirgacha 70 ta xonadonga bir boshdan qoramol topshirilgan bo‘lsa, yana 58 ta xonadonga ajratilgan qoramollar yaqin kunlarda o‘z egalariga yetkazilishi rejalashtirilgan.
Ma’lum qilinishicha, Sirdaryo viloyatining suv toshqinidan talafot ko‘rgan hududlarida uy-joylarni tiklash ishlari ayni yakunlanish arafasida turibdi. Suv toshqinidan zarar ko‘rgan 17 gektar maydondagi 132 ta xonadonni ta’mirlash Toshkent viloyati zimmasiga yuklatilgan. Hozirga qadar viloyatda ushbu vazifa 85 foizga bajarilgan.
Qurilish va ta’mirlash ishlarini jadallashtirish maqsadida qurilish ishlari 2 smenada tashkil etilgan. Viloyat “Yagona buyurtmachi xizmati” injiniring kompaniyasi tomonidan ajratilgan zaruriy mablag‘lar bilan hozirda 17 ta qurilish-pudratchi tashkiloti quruvchilari tomonidan ayni paytda hududni ichimlik va oqova suvlar bilan ta’minlash, ichki yo‘llarni qayta bunyod etish ishlari yakunlanib, hozirda obodonlashtirish, ko‘kalamzorlashtirish ishlari olib borilmoqda.
2020-yil 31-iyul holatiga ko‘ra, 128 ta xonadonning tom qismini profnastil qoplamasi bilan qoplash va pol o‘rnatish ishlari yakunlandi. Xonadonlarning tashqi devorlari bazalt plitasi bilan, fasad qismi esa travertin qoplamasi bilan qoplandi. Ayni paytda 120 xonadonda ichki pardozlash ishlari yakunlangan bo‘lib, qolgan 8 tasida davom ettirilmoqda. Har bir xonadon ichimlik suvi va tabiiy gazga ulanmoqda. Shuningdek, toshqindan zarar ko‘rgan yo‘llar to‘liq ta’mirlanmoqda.
Hozirgacha to‘liq qurilish-montaj ishlari yakunlangan 118 ta xonadon egalariga yashash uchun topshirilgan. Qolgan uylar 2020-yilning 5-avgustida foydalanishga topshirilishi ko‘zda tutilgan.
Eslatib o‘tamiz, Sardoba suv ombori to‘g‘oni o‘pirilishi ishi bo‘yicha to‘qqiz kishi qamoqqa olingan.
Izoh (0)