Moliya vazirligi tomonidan “‘2020-yil uchun O‘zbekiston Respublikasining Davlat budjeti to‘g‘risida’gi qonuniga o‘zgartish va qo‘shimchalar kiritish haqida”gi qonun loyihasi muhokamaga qo‘yildi.
Unga ko‘ra, 2019-yil 9-dekabrda qabul qilingan “2020-yil uchun O‘zbekiston Respublikasining Davlat budjeti to‘g‘risida”gi qonuniga o‘zgartish va qo‘shimchalar kiritiladi.
16-moddaning (O‘zbekiston nomidan va uning kafolati ostida olinadigan tashqi qarzning cheklangan hajmlarini belgilash) “4 milliard AQSh dollari” degan so‘zlar “5 milliard AQSh dollari” degan so‘zlar bilan almashtiriladi.
Ya’ni, 2020-yil davomida O‘zbekiston nomidan yoki uning kafolati ostida tashqi qarzni jalb etish bo‘yicha imzolanadigan yangi shartnomalarning chegaralangan hajmi 5 milliard AQSh dollari miqdorida belgilanishi kutilyapti.
3-ilovaning (2020-yil uchun davlat maqsadli jamg‘armalari va Tiklanish va taraqqiyot jamg‘armasining daromadlari prognozi hamda ularning xarajatlari) II bo‘limi quyidagi tahrirda bayon etiladi:
Vazirlar Mahkamasi:
- O‘zbekiston Tiklanish va taraqqiyot jamg‘armasining daromadlari prognoziga hamda ularning xarajatlariga ushbu qonun talablaridan kelib chiqqan holda o‘zgartishlar kiritadi;
- ushbu qonunning ijrosini, ijrochilarga yetkazilishini hamda mohiyati va ahamiyati aholi o‘rtasida tushuntirilishini ta’minlaydi;
- hukumat qarorlarini ushbu qonunga muvofiqlashtiradi;
- davlat boshqaruvi organlarining ushbu qonunga zid bo‘lgan normativ-huquqiy hujjatlarini qayta ko‘rib chiqishlari va bekor qilishlarini ta’minlaydi.
Eslatib o‘tamiz, O‘zbekiston hukumati nomidan va uning kafolati ostida jalb qilingan qarz qoldig‘i 2020-yil 1-aprel holatiga ko‘ra, 18,2 milliard dollar yoki yalpi ichki mahsulot (YaIM)ga nisbatan 31,3 foizni tashkil etmoqda.
Izoh (0)