2020-yilning dastlabki olti oyi hisob-kitoblariga ko‘ra, O‘zbekistonda aholi jon boshiga hisoblangan YaIM miqdori 7,49 million so‘mni (766 AQSh dollari) tashkil etdi. Bu haqda Davlat statistika qo‘mitasi ma’lumotlarida keltirilgan.
Aholi jon boshiga YaIM miqdori, joriy narxlardagi YaIM umumiy hajmini mamlakatning ma’lum bir davrdagi o‘rtacha aholisi soniga bo‘lish yo‘li bilan aniqlanadi. O‘zbekiston doimiy aholisining o‘rtacha soni 2020-yilning yanvar—iyunida 34 million kishini tashkil qilgan.
2019-yilning yanvar—iyun oylari bilan taqqoslaganda aholi jon boshiga YaIM miqdori 1,8 foizga kamaygan. 2018 va 2019-yillarning yanvar—iyun oylarida ushbu ko‘rsatkich mos ravishda 4,2 va 4,1 foiz o‘sishni tashkil etgan edi.
Aholi jon boshiga YaIM, asosan, iqtisodiy faollik va turmush darajasini aks ettiradi. Qisman bog‘liq bo‘lgan boshqa mezonlar uy xo‘jaliklarining moddiy farovonligini, xususan, ularning real iste’moli darajasini yaxshiroq aks ettiradi.
Jahon bankining ma’lumotlariga ko‘ra, 2019-yili O‘zbekistonda jon boshiga YaIM miqdori 1,7 ming dollarni tashkil etgan. Eng yuqori ko‘rsatkich Makao (129 ming dollar), Lyuksemburg (121 ming dollar), Singapur (101 ming dollar)da qayd etilgan.
Izoh (0)